© 2015, Josse Goffin, Regard à gauche

Ratacaedje : Li Walonreye a-t ele magnî des spinasses ?

Lucyin Mahin
Jacques Desmet

Texte

Jacques Desmet :
« Tot-z emantchant leus istweres di Tafta, Ceta, et hay vos nd åroz, il avént pinsé : « Nos n’ metans nén pinde nos lokes a des si bassès håyes. » Dj’ ô bén: les ptitès djins ou les ptits payis d’ Urope. C’ esteut l’ Comission el grand mwaisse do djeu.

                                                                       *

Mins vola l’ cayet : po on côp, li batch a rtourné so l’ pourcea. Et Magnette a divnou cnoxhou lon et lådje. Come li blanc leu. Po cobén d’ timps, dji n’ è sai rén.
« Kécfeye bén k’ ça va resse emantchî come des ceréjhes so on baston... paski gn årè del manoye k’ årè candjî d’ potche ! » (fén d’ ridjhaedje).


Li paskeye di l' AECG (CETA)

Les acoirds di libe comiece, c’ est ene sacwè al môde totavå l’ Daegne dispu on gros dmey sieke. Li Beldjike fourit ene des prumires avou l’ Benelusse (1949). Pu li Cmon Martchî a 6 (1957).
Mins dispu l’ 21inme sieke, c’ est des pus nouzomès sacwès. Insi, l’ Union Uropeyinne a 28, u l’ ALCAB (Acoird di Libe Comiece di l’ Amerike bijhrece, inte les Estats Unis, Canada et Mecsike). Les Aziyatikes et les Afrikins ont shuvou bagaedje.
Adon-pwis, on nd a volou fé des etercontinintås. Li Tafta (Urope EU), ki Djåke dit cial ådzeu, a bråmint pestelé, divant d’ esse abandné. Adon, les Uropeyins ont martchandé avou les Canadyins.
Mins gn a yeu des arokes. On a fén sogne ki les grossès måjhons d’ comiece amerikinnes ni vegnnuxhe fé leu lwè et taper a l’ abat les lwès des payis cwand ces lwès la disbrôlèt leu håsse di rfé des liårds [vont à l'encontre de leur appât du gain].
Magnete, èn ancyin prof di syince-po a l’ ULB, a studyî les tecses di l’ AECG dispu 7 ans. I trova ki les djudjes ki serént metous po les margayaedjes n’ alént nén esse neutes.


Carculaedje politike ?

Nén rovyî ki les socialisses ont stî rboutés å federå. Gn a k’ les liberås vaila come Walons. Come les socialisses sont mwaisses el Walonreye, eyet k’ li lwè bedje permete ås redjons di dire li leur dins les acoirds di comiece inte payis, ci fourit, metans, ene hinante ocåzion di mete des xhames el voye do govienmint d’ Brussele.
Si on rwaite les cis ki disfindît l’ acoird, on trove djustumint les cis do govienmint federå : Louiws Mitchî, ki s’ fi est prumî minisse, Didî Rénnderse, minisse des afwaires difoûtrinnes, et les economisses loyîs å MR.
Dins les cis ki sotnît Magnete foû payis, des comunisses come li Francès Melanchon, des ôtmondiålisses come l’ ôte Francès Bovet. Des cinsîs bedjes eto. Ey ene grande pårt des Walons, di tos les liveas sociås et clintchas politikes, tot firs ki leu ptite patreye mostere li voye do rendalaedje do bata [retour de balancier] del mondiålijhåcion.


Les gaztîs ont i stî serieus ?

N’ ont i nén fwait l’ diåle pus noer k’ i n’ est ? I nos ont mostré les coûtivaedjes d’ OGM et les vatches ås trôs-båketes el panse [hublots ruminaux]. Et rexhe l’ imådje do « tchvå d’ Trwè » ki l’ AECG pôreut divni po les industreyes amerikinnes avou ene fiyåle e Canada.
Oyi, mins les estats dimorront mwaisse di leus lwès. Motoit bén k’ non, dijhèt i les anti-AECG. Et mostrer li cåze del societé suwedwesse k’ atake l’ estat almand pask’ il a clôs les cintråles nawearinnes.

Lucyin Mahin, li 4 di decimbe 2016

Metadata

Auteurs
Lucyin Mahin
Jacques Desmet
Langue
Wallon
Relation
Revue Li Rantoele L° 80 ivier 2016-2017
Droits
© Lucyin Mahin, 2017