© 2015, Josse Goffin, Regard à gauche

C’ est vos k’ el dit:

Jean Cayron

Texte

Jean Cayron:
Les disfindeus d’ l’ acoird acsegnnut ki les payis d’ Azeye, Inde et Chine e leu tiesse, fwaiynut des demonés acoirds di comiece. Ki, si on n’ si mete nén avou ls Amerikins, c’ est les Aziyatikes ki nos dictêyront les rîles a shuve. Et nos serans sins crexhance economike. Oyi mins nonna.

On vôteu MR:
Mi k’ a bouté 20 ans dins ene societé amerikinne, dji m’ dimefeye di ces djins la, sûtis ådla cwand c’ est po haetchî li covtoe di leu costé.
On Condrozewalnî (djåspinreye Fesbok): Dj’ a disfindou co traze côp les Walons dins les raploûs economikes. Mins ç’ côp cial, dji n’ a sepou. Il ont fwait di l’ astocaedje d’ astokeus.

On vôteu PTB:
Ki front les cinsîs biyo divant des pris d’ dinrêyes poûsseyes a stok, so des meyes d’ ectåres di tchamps ?

Martial Ledecq:
Tocosté, on voet k’ el crexhance economike nos moenne direk å sbeulaedje e-n on meur. K’ i fåreut ataker so ene discrexhance eduråve [décroissance supportable]. Et après, on vout siner des papîs po co fé des pus gros benefices avou des pus gros acteurs economikes. C’ est dire blanc et fé noer.

co Jean Cayron, li 4 di decimbe 2016

                                                                        *


On pout pinser çou k’ on vout di
çou k’ a fwait Magnete et çou k’ il aveut padrî l’ tiesse. Mins gn a ene sacwè d’ seure enute : les ptitès djins pinsnut todi dpus ki les estats sont-st ås mwins d’ ene casse [caste] di grandiveus ki n’ schoûtnut k’ les patrons et pinsnut tot sawè mia kel pitit peupe. C’ est po çoula k’ Donald Trump a wangnî ås Estats-Unis, ki Le Pen assaetche les Francès et k’ les Inglès on vôté pol Brexit. D’ on costé, les pouxhants ås botes des ritches : Clinton, Merkel, Michel, Hollande. Di l’ ôte : nolu, såf des populisses. Berdeler di ces acoirds la dins des sålons d’ l’ Union a Brussele et dire après ås pårlumints k’ i n’ ont k’ a dire åmen, c’ est evoyî les djins ezès bresses des populisses. Çou k’ a stî fwait pal pårlumint walon, c’ est çou k’ i fåt fé pus sovint s’ on vout k’ les djins croeynuxhe al democraceye. Nos avans des droets et i les fåt eployî cwand i fåt. Magnete n’ est nén l’ schapeu del democraceye. C’ est on politikî k’ a odé l’ bon côp. Mins il a fwait bodjî les lenes.


Metadata

Auteurs
Jean Cayron
Langue
Wallon
Relation
Revue Li Rantoele L° 80 ivier 2016-2017
Droits
Jean Cayron, 2017