Lî boûkète

Georges Ista

Texte

C' esteut l' nute du Noyé, li mame féve des boûkètes,
Et tos les ptis efants, rassonlés dilé l' feu
Rin k' a houmer l' odeur ki montéve del pêlète
Si sintît l' êwe al boke et s' raletchît les deuts.

Cwand on costé del påsse esteut djusse a l' idéye,
Li mame prindéve li pêle, el hoyéve on ptit côp,
Et pwis, hop ! Li boûkète è l' êr féve ene dimèye
Et dvins l' mitan del pêle ritouméve cou-z å hôt.

- Lèyîz-m' on pô sayî, brèya li ptite Madjène,
Dji wadje del ritoûrner, d' adreut do prumî côp.
Vos alez vèyî, Mame. Et vola nosse glawene
Ki prind l' pêle a deus mins, ki s' abaxhe on ptit côp...

Et rouf ! Di totes ses fwèces, elle evole li boûkète.
Ele l' èvola si bin k' ele n' a måy ritoumé
On cwèra tos costés, so l' årmå, podrî l' pwète,
On n' ritrova måy rin. Wice aveut-ele passé ?

Tolmonde si l' dimandéve, et les cméres dè vinåve
Si racontît tot bas, al nute, åtoû do feû,
Ki c' esteut sûr li diâle k' esteut catchî dzo l' tåve
Et ki l' aveut magnî sins fé ni yene ni deus.

L' iviér passa. L' osté ramina les verdeurs
Et les esses di porotche ås djoyeus cråmignons.
Tolmonde aveut dèdja roûvî ciste avinteure
Cwand li mére da Mådjène fa rblanki ses plafonds.

Vola don l' bwègne Cola, blankiheu sins parey
K' arive avou ses breusses, ses håles et ses sèyês.
I cminça dè bodjî les ptitès bardaxhrèyes
K' estît avå l' manèdje; i westa les tåvlês
Ki pindît so les meurs; pwis, montant so s' halète
I dpinda l' grand mureu ki hågnîve sol djîvå.

Et c' est podrî l' mureu k' on rtrova nosse boûkète,
K' esteut la dpôy sî meus, co pus deure k' on vî clå
Neure come on cou d' tchapê, reude eco pé k' ine beye
Frèzéye come ine veye catche, et dzeur di tot çoula,
Tote coviète di strons d' moxhe, et télmint tchamosséye
K' elle aveut des poyèdjes co pé k' in agora.

Metadata

Auteurs

Georges Ista

Sujet

Souvenirs d'enfance. George Ista. écrivain liégeois 1874 -1939

Genre

Poème

Langue

Wallon de Liège

Relation

Revue Cocorico n° 59, 4e trimestre 2021, Liège

Droits