Fayè tans

T't-ôssi gris qu'ène piére dè tombe,
èl cièl èskeume sès nwâres pinséyes ;
il-a pièrdu l' biatè dè sès bleûs-îs,
foc du gris pa t't-avô l'èstwalî.

Su l' tourniquèt dèl vîye, rassis pèneûs,
èl bon tans ratind souspirant
qu'in nû solèy fèsisse risète
pou rinstchôfer lès keûrs froûyeûs.

Dji ratind al potèle du tans
què l' tans pèrdisse èm mangn
pou drouvri l'uche ô soley lûjant
qui mèd'cin'ra l' tère dè sès cochures.

Come èl tans m' chène long
pa-d'sous l' gris dè vos nuwâdjes,
a vîr lès p'tits mouchons transis
cachî in rèsse dè glètes, dè pèture.

Djuglant dèvins l' nîve toute frèche,
l'èfant, li, ratind qu'i din kèyisse co d' pus ;
fé boulome dè nîve a toudis fét d' s-eûreûs,
qui seûss'tè p'tits, qui seûss'tè grands.

Mès mi, ça n'èst nîⁿ ça què dji ratind,
mi, c'èst l' solèy què d' vwa vol'tî,
èl cîⁿ qui va ragrôyî vo coûrp a la vîye,
qui va ragoustér l' tère a l'invîye.

Way, dji ratind, d'é vu l' Cand'lé dè su l' kèmin,
dji sû seûr tout mèt'nant qu'i n' d-a pus pou lômint ;
l'orlôdje èrprind du tans tout bèl'mint,
a l'iviér bîⁿ râde, dji skèt'ré lès rangn'.

Ayér' l'iviér' s'intèrtènoût avû l' fayè tans,
dèmangn, al cwâsâde dou k'min, dji sèré
èt come tout l' s-ans, ène rossûre il-âra
pour li, l' fayè tans lyî ara r'pris s' n-alène.

© Christian Thonet, revue èl Mouchon d'Aunia 3-2021

Notes
froûyeûs -e: frileux -euse
glètes: reliefs, menus restes
pèture: nourriture
rossûre: raclée