Istwâre dè guère

Ç'astoût ène djournéye d' chance pour mi! D'é yeû l'ocâsion dè racatér 'ne bascule a 'ne coupe dè djins qui ont couneû l' guère 40-45.

*

Èl feume travayoût dins 'ne sôciètè qui, dèl guère, astoût foûrt frécantéye pou s' pangn. Èl feume, lèye, avoût travayî avû l' bascule èy èle d-avoût éritè.

In bia djoû in 2003, ès' n-ome èyèt lèye avin'tè dècidè dè s'in fé quite èyèt d' l'èrvinde.
Dju l'é racatè pou in pris résonâbe. In l'inspèctant, d'é dèscouvri qu'èl bascule astoût truquéye!... bîⁿ seûr pou avoû lès-Al'mands ô pway.
Ç'astoût 'ne bascule qui avoût chèrvi pindant l' guère ; ène guère qui n'âroût nîⁿ d'vu arivér.
Mès qui c'èst qui sâroût dîre çu qui ariv'ra d'mangn?

Du r'vîⁿ al bascule frôdéye... d'é trouvè çu què ç' brave feume la èn' savoût nîⁿ... Lèye qui avoût travayî pindant toutes lès-anéyes d'ocupâcion avû ç' n-osti la.

In kulo tout djusse avoût stè muchî dins l' platia qui suportoût l' pwad dèl pèséye: intrè l' vûde, ène plantchète astoût clowéye pa d'sous l' platia, avû, in d'dins, dès bokèts d' fyérs a tch'vô, dès clôs, dès fèrayes, dès bricayons, minme in morcha d' pane! Infin, tout djusse in kulo qui d'moroût dins l' nwâr.

Èl cîⁿ ou bîⁿ l' ciène qui a yeû l'idéye dè trafiquî ç' bascule la a yeû branmint d' l'ôdace. Bîⁿ seûr, il-ont fét ça sans s'in vantér, sinon lès punicions ârin'tè stè tèrîbes.

*

Après l' guère, ç' façon la d'abûsér l'ocupant èst d'moréye dins l'ombe. Potète què cès djins la astin'tè roubliyîs ou bîⁿ disparus.
Èl bascule avoût toudis in kulo d' difèrince... dusqu'ô djoû què du l'é dèscouvri.

C'èst l'istwâre d'ène bascule in tans d' guère... ! 

© Lily Faes, revue èl Mouchon d'Aunia 3-2021

Note
pane: tuile