© 2015, Josse Goffin, Regard à gauche

Li bagance dispu ki l’ monde est monde

Lucyin Mahin

Texte

Manfred Lejoly, dins on responda pol tévé waloncåzante, si sbara des reyaccions, covite fachisses, des djins, so les djåspinreyes éndjolikes [fora] et les rantoeles di soçnaedjes [réseaux sociaux].
Portant, l’ ome a todi bodjî foû payis, dispu ki l’ monde est monde.


Li frileusté des Uropeyins si voet docô al manire k’ il ont lomé les mouvmints d’ bagance [migrations humaines] aviè l’ Urope e 2015 : li crijhe des abagants.

Les chifes
Li chife ki s’ a spårdou pattavå les medias al difén d’ l’ anêye passêye : on miyon d’ abagants avnît e l’ Urope, tot trevåtchant l’ Mîtrinne Mer. A rmete ås 250 miyons di dmorants des payis ascoyeus. On trove ki c’ est Mouze et les vås.
Dispu 2011, li Tourkeye nourit et lodjî 2 miyons et dmey di Siryins, po ene peuplåcion di 70 miyons d’ Trouks.
Asteure, loucans ene miete ene mape des mouvmints d’ djins aviè 1850. On voet ki l’ Urope evoye des banslêyes di djins eviè l’ Amerike bijhrece, ene miete sol Braezi, et eto ene cåkêye après l’ Ostraleye.
Dins on novea live rexhou a l’ ocåzion del fiesse ås lingaedjes walons, Erness Benwet raconte les rascråwes des djins d’ Anloe al guere di 14. Li påye rivnowe, n’ a pont d’ ovraedje po nouri les pekêyes d’ efants ki nos tayons fjhént co a ç’ moumint la. N’ aveut k’ ene vudindje : ebaguer. Insi, di 1850 a 1930, les Walons sont-st evoye el Wisconsene ey ôte pårt ezès Stats Unis, å Canada, å Braezi (tuzez å pa da Joao Havelange, li ci k’ a stî prezidint do Comitî olimpike). Pu å Congo et Rwanda-Ouroundi.

On a sogne ki les noveas arivants catchexhe des sôdårs innmis, a môde d’ ene « cénkinme colone ». Mins nozôtes, les Uropeyins, k’ avans dj’ fwait, tot-z arivant e l’ Amerike ey e l’ Afrike. Distrujhaedje des impires asteke ey inca; djenocide des Indyins carayibes; dimezindjnaedje [de décimer] des cis des Estats Unis.

Pår des Bedjes ont bouté al tcherete. Savoz bén k’ on mete asteure sol djivêye des peupe-sipatas [génocides] les 2 miyons d’ Congolès k’ årént morou djusse après l’ colnijhaedje pa Yopôl II ? Pask’ on les bateut po k’ il ovrénxhe ezès plantisses d’ åbes å cawoutchou.

Kî çk’ ascoye li pus d’ abagants ?
Asteure, loucans ciddé sol costé, des chifes sol bagance inte 1960 eyet 2010, ki dispårtixhnut les rçuvants payis sorlon leu ritchesse. On voet ki les ritches payis ont ascoyî 128 miyons d’ djins, sol tins k’ les pus pôves payis endè rçuvént 86 miyons. Co ene mintreye, dabôrd, di dire ki les djins aplovèt après nozôtes po nos haper nos ritchesses.

Åresse, les abagants apôvrixhèt i les payis k’ il î avnèt. Oudon l’ contråve ?
Onk des pus vîs egzimpes di diswalpaedje d’ on payis pa des abagants, c’ est l’ ci del Suwede. Avou les Walons da Louwis d’ Djer, li payis fjha ene fele ascoxheye e-n avant, et divni onk des prumîs produjheus d’ instrumints d’ fier (inte di zels, des canons).
Loukîz les sincieus almands ressåvés e l’ Amerike, et k’ ont stî po bråmint dins l’ evoyaedje d’ ene fizêye amerikinne avou des djins sol lune. Waitîz ossu li vitesse do progrès d’ Israyel inte 1950 eyet 2000. Tot çoula avou des abagants.
- Mins ces refudjîs la ki nos arivnut asteure, i n’ savèt rén fé. I vegnnut djusse po profiter d’ nos moutouweles et d’ nos lwès sociåles.
Co on côp ene fåsse idêye. So 100 afuyîs siryins ou irakyins, end a 30 k’ ont on diplome d’ umanités, et 10 a 15 ont stî a l’ univiersité u dins les hôtès scoles.

Pocwè k’ Angela Merkel a accepté d’ endè prinde 800.000 e 2015 ? Paski l’ industreye almande, sins djonnes po rprinde les posses des vîs k’ evont al pinsion, aléve bénrade tourner a cou d’ poyon.

Lucyin Mahin, li 8 di fevrî 2016

Metadata

Auteurs
Lucyin Mahin
Langue
Wallon