In Memoriam : HENRY MATTERNE, vice-président des Rèlîs Namurwès (1929-2015)

Po rinde bon d’vwêr à nosse soçon Henry

Cès bokèts-ci, djè lès-a scrît tot ’nn’alant èt riv’nant d’ Paris au mwès d’octôbe passé. On lomeûve li voyadje Pari(s) sur au-delà. Asteûre qui dj’ lès r’lî, dji m’ di qu’ Henry n’èsteûve nén lon èri d’ mès tûzadjes. C’èst po ça qui dj’ lèzî done fwârt voltî. Li dêrén bokèt, djè l’a scrît deûs djoûs d’vant qu’i n’ nos rinde li sofla qu’il a viké avou...

I faît gris
I faît frèd
Qué pèneûs djoû !
Pus grigneûs qu’on djoû d’ Tossint.
On timps po s’ règrignî.
On timps po s’ ragrancî
di r’veûy li solia !

(...)

Skèpî èt moru, valèt,
c’è-st-one afaîre d’alin.ne

À r’çûre èt à rinde.
Po c’mincî èt r’comincî.

(...)

Aurîz co peû d’ moru, valèt,
si v’s-aurîz d’dja pièrdu
tot ç’ qui v’s-avoz r’çû ?

(...)

On-aube, valèt,
s’i n’ vout nén piède sès fouyes,
i n’ si rècrèstéyerè jamaîs
au djon.ne bon timps

(...)

Quand on tchaît al têre, valèt,
on s’ rilève !
Èt quand on tchaît mwârt ?
On s’ rilève èto...

si lès vikants vos r’lèvenut, todi !

Parén,
gn-a-t-i one vîye après qu’on-z-a moru?

- Dji n’è sé rén, curieûs bokèt !
Mins ç’ qui compte,
c’èst d’ fé paurt di fréres
vêci,
èt raddimint !

Po l’ rawète, vaut mia s’ taîre !

Moru, valèt,
c’èst lèyî l’s-ôtes vos dîre po d’ bon
quî ç’ qui v’s-avoz stî,
quî ç’ qui v’s-èstoz
èt quî ç’ qui v’ sèroz

Joseph Dewez, R.N.