In djoû ou l’ôte...

In djoû va s' luvér, lûjant d' soya qui ravèy'ra ô pêrfond d' nous minmes nos pléjis d'ârnagat : sôt'lér come in gad'lot t't-ô di long dès pîssintes, ès´ coutrouyî dins lès wôtès-yèbes, fé dès cumulets dins dès pachîs, s' lèyî bèroûlér al valéye djusqu'ô bôrd du richot, s'èrwétî a s' murwè, ès´ trouvér bia, bagnî sès pîds èyèt fé spitér l'eûwe tout sès pus fôrts dèvant d' ralér a s' môjo, cru come in pèchon, èfant rwè d'ène famîye al donéye !

In djoû ou l'ôte...
In djoû va s' luvér, lûjant d' soya qui ravèy'ra ô pêrfond d' nous minmes dès-ârguèdènes du tins qu'èst woute : ér´ pou routér drwèt, musique pou dansér, tchansons pou vîr vol'ti, èdôrmètes, blankès fachètes, oûrbaléye di notes di toutes lès couleûrs dispôrdûwes a l'invîye su dès-inocints qui roublîy'neut qu' lès-eûres qui font bèle bèle squiv'neut toudis pus râde què l's-ôtes.
In djoû ou l'ôte...
In djoû va s' luvér, lûjant d' soya qui nos trouv'ra èdaglès dins dès souv'nis èt misér'rîyes d' vîyès djins : djambes coudûwes èyèt vwès èrunîye contant èt racontant dès-istwêres qui font soumadjî, disfaçant saquants r'môrds, spèlant dès cûjants r'grèts, toûrnant doûç'mint les pâdjes d'in lîve as imâjes, spès come ène vikérîye, an tout sondjant què pa d'rî l'uch, gn-a p't-ète dèd'ja l' flaya qui s' muche !
In djoû ou l'ôte...
In djoû va s' luvér, lûjant d' soya qui n'âra pus qu'a rascoude saquants fleûrs èyèt lès nwêrs loyins d'in requiescat !

Danielle Trempont
walon d' Mont'gnî (Montingny-le-Tilleul)