In vwèyâdje a Somzéye

Dès souv'nances dèl guêre quatôze dij wit´, dji d'é dès monchas. Pus d' mwéjes qui d' boûnes, bén seûr...

C'è-st-insi qu'in djoû d' 1915, nos-astons pârti avou m' frére Pière pou Somzéye, woute di Târciène. On daleut qué dèl rafouréye pou lès deûs t'chvôs – Boulète èt Fanîye – di m' popa.

I fèyeut in tins d' tchén. Ène pètite plouve glacéye nos pèrceut djusqu'ôs-ochas. Come nos-astîs achîds ô d' dizeûs d'in camion discouvru, qu'in vint d'èst´ nos soufleut dins l' né, vos compèrdrèz facîl'mint qu' nos tchantîs nén no bouneûr di yèsse ô grand-èr´.

On chûveut l' route di Filip'vile pal queuwe di Couyèt, Lavèrvô, Nôlènes, Târciène pou arivér a Somzéye.
Rén si spécial a racontér, sôf qu'al sôrtîye di Nôlènes, su l' drwète dèl route, on-aveut vèyu ène plaque su l' façâde d'ène môjone qu'in Prince di Hohenzolern aveut stî tuwè su place ô mwès d'awous´ quatôze XX. Pés a s-n'âme, mins i n'-aveut nén dandjî d' vènu...

Saquants cints mètes pus lon, nos rèscontrons in grand plat camion al'mand, min.nè pa dès tch'vôs.

Su l' camion, sont-st-alignis dès cèrkeuys – dîj ou douze – èt achîds su cès-ci ène coupe di sôdârds gris qui... chufèl'nut ! An passant près d' nous, is nos saluw'nut sins rén dîre...
Nos nos r'wétons, èm´ frére èt mi... Nos goyîs s'irsèr'nut... Qwè ç' qui c'èst ? Nos d'ôrons bén râde l'èsplicâcion.

D'ayeûrs, èl kèdje qui nos v'nîs d' rèscontrér puweut l' môrt a cint pas... èt avou l' vint d' tampète qui zûleut, nos d'avons prîs d' pus dins nos né qu'avou ène iscoupe !

Nos-astîs arivès su Târciène, quand ô bôrd du grand route, su no gôche, a procsimitè d'ène dîjène di p'titès môjones, nos apèrçuvons tout-in groupe di sôdârds al'mands an trin d' trawér ène tranchéye d'ène trintène di mètes di long.

Avou dès piyoches, dès longuès grawîyes di fièr, is r'mèt'nut a djoû dès cadâves a mitan dismourcèlès... I d'a bén cénquante ! C'èst dès sôdârds al'mands qui sont v'nus s' fé tuwér la ô mwès d'awous´ quatôze pou leû fameûs Kézêr ! On lès distère pou lès mwin.nér ô cimintière militère di Nôlènes XX.

Èl sin.ne n'èst nén ragoustante. Pourtant, nos-arêtons no camion pou wétî... In groupe d'oficièrs, wôts gradès a ç' qu'i nos chène, si tént a boune distance du sinisse trô, ô r'cwè du vint d' plouve qui soufèle toudis ôssi fôrt...

Nos nos-atindons a ç' qu'on nos fèye spitér èvoye, mins non. Is n' dîj'nut rén... èt nos pouvons nos rinde conte dès-oreûrs dèl guère. Ça n'èst nén bia !

Dji m' sin tout drole :
« Frére, di dj' a Piêre, si on pouveut trouvér in cabarèt pou nos r'tchôfér avou ène pètite goute ? »

Djustumint, l' dérène môjone du coron qu'a yeû s' pignon trawè pa in obus, èst drouvûwe. On î vint co a bwêre. Nos-î trouvons ène boune jate di tchôd cafeu avou ène goute di jenéve didins... On-èst tout rapôpiyî èt nos pouvons nos r'mète an route.

C'è-st-amon l' mayeûr qui nos d'vons kèrdjî l' foûr. On nos-invite a din.nér. A din.nér ! Nos n' d'avons nén l'apétit môgré qui l'ocâsion èst bèle... mins nos-avons co d'vant nos-îs l' tablô qui nos v'nons d' vîr. Èl pwin d' frumint asteut pourtant bén blanc...

Intrètins, lès djins dèl môjone avît kèrdjî no camion èt i faleut prinde èl tchumin du r'toûr... pal minme pavéye. An rarivant ô bôrd dèl fosse, nos wèyons qu'èle èst r'bouchîye. Pus pont d'oficiérs bèrdouyant dins lès têres. Èl vint qu'aveut toûrnè a l'ouwèst´ nos pèteut ô né èt nos r'ssoufleut l' goût d' charogne qui nos-a nôji dèl matinéye. In dérin tchôr pôrtant onze lujas bringu'baleut a cint mètes divant nous. Toudis achîds su lès cèrkeuys, lès Fritz chuflît leûs-érs sins s' dè fé pus qu' ça.
Èl vènéye div'neut insupôrtabe. Rabatûwe pal plouve qui n' lacheut nén, èle nos stouficheut; nos d'vènîs vêrts di disgout :
« Frére, fôt absolumint lès ratrapér ! »

Fôt crwêre qui nos tch'vôs ont compris. Is-ont alonjè l' pas. A l'intréye di Nôlène, ô Bultia, nos-astîs anfin scapès !

An rintrant, nos-avons racontè no vwèyâdje mouv'mintè. Mi, dji d'é co rêvé pâr niût !

*

L'ivièr quatôze a passè... L'arméye bèlje arètéye t'ô long d' l'Ysèr disfindeut vayamint l' pètit lopin d' têre qui nos d'mèreut. Lès gris, instalès dins l' payis, moustrît qu'is-astît mésses, èt pourtant èl peûpe walon, an sèrant sès pougnes, an grignant dès dints, fèyeut face a l' èn'mi. On s'organiseut, p'tit-z-a p'tit dins l' guêre...

Èm´ popa, avou sès-omes disponibes, aveut stî kèrdjî pa l'administrâcion di dismoli ène sèrîye di môjones sinistréyes du boul'vard Audent èt dèl rûwe dèl Montagne a Châlèrwè...

Félicien Barry