Modiene famile

Cwand « Står-Trake », li prumî rîlêye-fime [télésérie], a-st ataké e 1966, c’ esteut so l’ difén do trevén do metaedje a pårt [ségrégation] divins les Estats Unis.

Les blancs et les noers ni s’ polént nén co maryî eshonne, les efants noers et blancs ni polént nén co aprinde ezès minmès scoles etch.

Portant, so les tévés, les Amerikins ont veyou des noers et des blancs, et minme des rodjes et des blåwes [pâle] di pea bouter eshonne, magnî eshonne, fé cope eshonne, tot fjhant shonnance di rén.
C’ est ene miete ci fime la k’ a candjî les idêyes des djins. L’ avni si prezintéve sifwaitmint ; i s’ î faleut adure.

Cwand des pus djonnes (et ddja nén des Amerikins) ont rwaitî les prumîs fime-bokets, gn a rén ki les a sbaré. Mins les Amerikins del viye môde k’ ont loukî ces bokets la å posse dins les anêyes 1960, sabaye [reste à voir] s’ il ont dmoré ståmusses.


Et kéne novele di nos djoûs ?
Vola çou k’ on-z ôt dipus k’ a s’ toû:

« Ene djonne comere avou èn ome pus vî et divoircî, c’ est tofer po les cwårs. Gn a pont d’ amour ådvins, nén del pårt del feme, todi. »

Ou : « Les rbastêyès familes, c’ est des grandès djins ki n’ pinsnut k’ a zels, et måy ås efants. Les pôvès glawenes et råpéns [gosses], i lzî fåt esse aclevés pa des etrindjirs ! Ene måråsse u on påråsse [marâtre, beau-père] ni såreut måy vey ses fiyåsses et feyåsses [fiyâtre, belle-fille] si tant voltî ki ses prôpes efants ! »

Ou bén : « Les tchets n’ fwaiynut pont d’ tchéns. Si les parints sont biesses, les efants crexhront biesses eto. Si les parints sont sûtis, les efants totsi sûtis, avou. »

Ou co : « Ene cope di deus omes ni såreut aclever èn efant, foiravant si c’ est ene båshele. »

Ôte sacwè : « C’ est kî ki fwait l’ ome? Kî ki fwait l’ comere?»
Co on côp : « S’ èn ome est on djan-comere, i n’ court nén après les cotrês, mins purade après les marones. »

Eto : « On tchén n’ est nén on mimbe del famile. »
U co bén : « Ene comere ni såreut awè des mestîs « d’ ome »; metans, manaedjresse d’ ene copagneye ou moenneuse di tacsi. »
Poy : « C’ est todi l’ ome ki tént l’ pot droet el måjhon. »
Ou co : « Dins on dismariaedje, c’ est todi l’ ome les cåzes. »

Et tchik et tchak..
Modern family
Adon e 2009, gn a on rîlêye-fime k’ a-st ataké, et ki s’ lome « Modiene famile »1, et ki mostere tos ces splacas [clichés] ci, et co bråmint des ôtes, avou.

Divins l’ fime, gn a on vî ome, lomé Djaiy, avou s’ djonne feme et l’ gamén d’ citlale, k’ est foirt sûti po s’-t ådje. I vicnut avou l’ dierin roufion k’ il a yeu avou s’ deujhinme feme. Come vijhéns, d’ on costé, gn a l’ feye da Djaiy avou s’ famile.

Di l’ ôte des costés, gn a l’ fi da Djaiy avou ses djins. Mins ces deus familes la sont ene miete a pårt eto. Li feye est marieye, et il ont troes efants, k’ ene est ene pitite sincieuse, ene ôte biesse a magnî do four, et on gamén a pårt. Li fi da Djaiy est maryî avou èn ome, et il ont-st afiyî [adopté] ene pitite Vietnamyinne.
Po fini, li ptite-feye da Djaiy k’ est foirt biesse mete å monde ene djermale, et s’ maryî.

I gn a yeu 11 rîlêyes [saisons de tournage], ki l’ 11inme n’ est nén co foû, mins ci serè l’ dierinne.

Ås Estats-Unis, li rîlêye-fime a stî fwait po ABC (Disney). E l’ Beldjike, Modiene famile est waitåve so les tchinnes Play More (Telenet), RTL-TVI, Q2, et Comedy Central.

Dipus d’ racsegnes sol Wikipedia walon.


Georges Staelens-Sfasie, li 27 di nôvimbe 2019

© 2020 Licince GNU di libe documintåcion