Li batreye di Poitchrece

N a des passaedjes di l’ Istwere ki les istoryins ni cnoxhèt nén. Paski pocwè ? Paski ça n’ a stî scrît nene pårt. Metans, li vraiy disrôlmint del bataye di Poitchrece e l’ guere di 14.

*

Dimandeu (Dm.) - N a yeu des cayets estrordinaires, ciddé al guere di 14 ?

Lucien Collin (L.C.) - Vos fåt dire ki Poitchrece, c’ est on viyaedje-mårtire, come on dit. Pocwè ? Paski l’ viyaedje a stî totafwaitmint distrût å matén do 24 d’ awousse 1914.
C’ esteut on redjimint d’ piyotes almands, cazernés a Bone, k’ avént-st abroké pa Wilse, Bastogne et Sint-Houbert, et i s’ avént aresté a Lompré.
I fjhént 40 kilometes par djoû, et a pî, hin. Après Lompré, les voyes estént bråmint pus stroetes.
Adon, i s’ ont cpårti e deus plotons.
Onk vineut d’ Dåvdisse et l’ ôte vineut d’ Djimbe. I s’ ont rescontré ciddé a l’ intrêye di Poitchrece.
Et les Francès, k’ avént ddja arivé ciddé dvant, il avént astalé des baricådes – gn a co on pî d’ mitrayeuse francès dins l’ paxhi padrî.
Il avént metou des fis d’ ronxhe, il avént côpé des åbes, il avént ståré des tchårs po-z espaitchî les Almands d’ avancî.
Et gn aveut on captinne francès, ki cåzéve vormint bén l’ almand, sins accint. Et ci djoû la, cwand les Almands ont-st arivé al vesprêye tote basse, il a vite fwait noer.
Et c’ esteut ene nute sins lune, avou des spès nouwaedjes. I fjheut noer come dins on for. Fishmeister, k’ a divnou coronel après, esteut d’ ene famile d’ Alzace k’ aveut-st ebagué al guere di 1870.
Et il a djouwé cwite u dobe tot s’ aprotchant des lenes almandes, sol tins k’ les Francès si rtirént. Il estént sol Bôlisse, k’ est so ene hôteur, et å tchestea.
Adon, il a cmandé l’ bataye e-n almand. Ça fwait k’ les Almands s’ ont touwé eter zels. I s’ ont etertouwé, djans. Et m’ grand-pere m’ a todi raconté k’ i gn aveut etur 3000 et 5000 moirts. Mi grand-pere dijheut k’ i ramasséve les botons d’ capote al schoupe et al berwete. Et tot ça n’ a djamåy sitî scrît.

Dm. - Pocwè ?

L.C. - Paski les Francès n’ ont waire yeu d’ pietes, ene dijhinme a pô près. Et les Almands, zels, estént télmint honteus di leu bolete, k’ il ont-st etaessî leus cadåves e deus plaeces (å Molén, e-n alant viè les Rives, ey e l’ måjhon ciddé, djusse dilé l’ tchamp d’ bataye.

Dm. - C’ est l’ veur k’ il avént ddja des fors po broûler les moirts ?

L.C. - Åy ! Il avént des rayixhoes [fours crématoires] ambulants. Mins ces-la, i ls ont putoit eployî al bataye di Bive. Ciddé, i ls ont eteré.

Dm. - Mins les istoryins n’ sont nén d’ acoird avou l’ bilan d’ 3000 a 5000 moirts.

L.C. - Come di djusse, pask’ i gn a pont d’ prouve sicrîte ki pôreut acertiner ci nombe di moirts la. Les Almands estént bén trop peneus po scrire çoula, et les Francès, zels, i n’ ont nén batayî. I s’ ont rsaetchî.
I n’ plént nén conter les moirts almands, pusk’ i n’ estént pus la.
On a tolminme on temonaedje d’ on sôdård almand k’ esteut on grand pondeu almand, di Bone, ki scrijheut a s’ feme. « C’ ere ene mangonreye [boucherie, carnage] djamåy pareye. Dj’ esteu e l’ infier » dijheut i dins s’ lete.
Et on a co deus ôtes temonaedjes almands.

Dm. - Il aveut sorviké, lu ?

L.C. - Lu, i nd aveut rschapé, mins il a stî touwé dins les batayes del Måle [Marne] kékes djoûs pus tård.

Rivindjince

Dm. - Les Almands dvént esse mwais, dazår, d’ awè yeu ostant d’ touwés. Cwè çk’ il ont fwait ?

L.C. - I s’ ont rindou conte di leu biestreye a l’ aireur do djoû. Il ont prins ene vintinne d’ ostaedjes. I ls ont moenné dins ene gregne a Graide, et il ont bouté l’ feu å viyaedje.
I n’ a dmoré ki kékes måjhons å coulot d’ la-hôt, ki c’ esteut les pus pôves des djins did ci, et on coulot metou foû do tchamp d’ bataye.
Fåt dire ki c’ esteut nén des måjhons vormint e deur, ca c’ esteut co des meurs di stramé [torchis] et d’ fexhaedje [entrelacis de branchages] ki prindént feu åjheymint.
Et i ls ont broûlé ossu po s’ loumer, ca i fjheut co noer, et il avént peu k’ i gn åye co des Francès avår la.

[Responda moenné pa Lucyin Mahin li 1î d’ awousse 2020, Rantoeles l° 95, l° 96.]

© licence de libre utilisation CC-BY-SA 4.0