© 2015, Josse Goffin, Regard à gauche

Lès djins malôdes du coronavîrusse

Pierre Otjacques

Texte

Ène minêye avoyêye dul Chine
Kîrant lès djins, brokant s’ leûs chines,
Su stramlot pa t’t-avô la tère
Pou fwêre dès mwârts come an tins d’ guère.
L’ covid 19 û l’ corona
Come tourtous l’ loumint avô la
Côpot ôs djins la chike èt l’ gous’
Inflant peûmons èt dnant la tousse.
I l’zî anondot l’ feû dins l’ cwâr
Lès lêchant a l’ ascate dul mwârt.
Tourtous bin chûr n’ è morint nin,
Mês ç’ côp la brâmint d’ nôs ancyins
Son-st-èrvôye ou cîr pou toudi
Sins rvèy leûs parints leûs-amis.


Lu mwêsse dul Chine èt sès minisses
Dul minêye ont mzèrés lès risses.
D’ Wouhan vint l’ apèstifèradje,
Sa contrêye srè an racloyadje.
T’t-an l’ fujant a catchète du monde
Duvant ku la mwârt nu s’ anonde
Jingping è trovu lès coupâbes
I lès va èvoyer ou diâbe
Du martchî. C’ èst lès boutikîs
Ki sont tourtous dès barakîs.
I va foute djus lès pitites djins
Ca il alvèt dès pangolins.
Lès prumîs apèstifèrés
Vont don tourtous z-èsse acsègnés.


Lu vîrusse s’ è stôré s’ la tère
Dul Russîe djusk’ a l’ Angletère.
Pa t’t-avô lès gouvèrneumints
Sont dmèrés lonzins trop lontins.
Ène tchîtchêye du vîrusse inla
Trop flawe pou cès ritches payis la.
Leûs sincieûs come dès-apurdisses
Ont bin mô consyé leûs minisses.
Lès mwârts ont rimpli lès çmintîres
Dès pon.nes pou dès famiyes atîres.
Lès djins du peûr su racloyint
Adon drî leû maske su catchint.
Lès coupâbes c’ èst lès tchawes sèris
K’ ont stramlé l’ pèsse dins lès payis.


Lu prèsidint amèrikin
Donald ô ptit nom d’ inocint
Nu pwâte nin sa mizére su s’ dos
Èt prind sès djins pou dès bèdots.
C’ èst bin trop tôrd k’ i s’ î èst pris
Pou prinde dès mzères èt mète lu pris.
Al TV il è fwêt du s’ nez
Pou in nolu s’ è fwêt passer.
Pou li lès coupâbes sont chinwès
Dès sincieûs apurdisses sins lwè
Du leûs labos leûs rats sortus
Ont cussamé èt apwârtu
La mwârt dins tous nôs bês payis.
C’ èst zês la côze, fôt lès punis.


L’ cé k’ è fwêt l’ côp n’ srè nin puni,
Lès lonzins dècideûs non pus.
L’ cé ki n’ è put rin payrè l’ pris !
Grâce lès binvlants k’ ont pon.né l’ pus !

 

© Pierre OTJACQUES (wallon de la Haute-Lesse)
Sur une idée de Jean de Lafontaine Les Animaux malades de la peste.

 

Malêjis mots

acsègner = frapper, rosser.
alver = élever.

apèstifèrer = empester.
apurdisse = apprenti.
ascate = extrème limite, extrème bord.

binvlant = volontaire, bénévole.
cîr = ciel. / ç(u)mintîre = cimetière.
cussamer = semer largement.

cwâr = corps.
flawe = faible.
grâce = remerciement, faveur, grâce.

lonzin = lambin, lent à agir.
loumer = appeler.
minêye = épidémie.

nolu = nullité, individu minable.
p(i)tit nom = prénom.
pon.ner = peiner, travailler avec effort.

racloyadje = confinement.
s(u)tramler = répandre, éparpiller.
tchawe sèris = chauve souris.

tchîtchêye = très petite quantité.





Metadata

Auteurs
Pierre Otjacques
Sujet
Corona virus
Genre
Fable rimée
Langue
Wallon de la Haute-Lesse
Relation
Revue SingulierS 2-2020
Droits
© 2020 Pierre Otjacques, revue SingulierS 2-2020