Di davance et d’ ouy. Côps d’ cour, côps d’ betch

Fåt i croere li « Canard enchainé » do 18 di nôvimbe 2015 ki rapoite on pretchmint da Rachid Abou Houdeyfa, recteur del moskêye Sunna di Bress e 2013 ?

Li Bon Diu (« Ala » e-n arabe) n’ inmreut nén l’ muzike, paski c’ est çou ki l’ Diåle voet voltî. Ossu, les tchanteuses et les tchanteus seront i eterés li pus bas possibe et i dvénront des mårticots ou des pourceas.

Vozôtes, les moslimîs

On tuze todroet ås atacaedjes di nôvimbe 2015 el France disconte del bwete a danser « li Bataclan ».
Leu dvize pôreut esse : « Moirt al djoye do viker ! Longue veye al djoye do mori ! »
Mi, dji tuze a Djåke Bertrand, ås Sullon, a Bob Dechamp et a tos les tchanteus d’ totavå, ki nos ont rindou si ureus, tot do long d’ nosse vicåreye. I fjhèt pårteye di nosse veye. I vos raplèt vosse prumî bal, vosse tins d’ sôdârd.
Jean Ferrat tchante : « Les cmeres, c’ est l’ avni des omes. » Adon ki, dins des payis muzulmans k’ i gn a, ele sont djusse bounes a dmani el coulêye, mousseyes a spawta, come des noerès didisses [bestioles].
Pocwè s’ moussèt i come des cmeres, avou des longuès blankès cotes, les bårbous ? K’ i sayexhe don di nos fé cnoxhe li paradis chal sol tere, tos les cis ki nos prometèt l’ infier si nos n’ shuvans nén leus regues, leus Iwès, leu politike, li pårti ki les ahåye, ki les arindje, k’ i polèt mwaistri a leu môde.

Vozôtes, les catolikes

Hitler fwait broûler des miyons d’ djwifs. Mussolini språtche li payis d’ å Negusse. Franco ahesse les gåtchisses di l’ Espagne po ndè divni dictateur. Nén on seu mot do Vatican po lzî dire leus vraiyes, a ces harlakes. Ki do contråve !

Vozôtes, les Francès

Saye on pô, tezôtes les bårbous, minme après l’ prétins arabe, d’ aveur e t’ payis on prezidint come Coluche ! El France, c' est possibe.

Vozôtes, les Amerlokes

What a wonderful world ! (ké clapant monde !)
Cwand onk di leus prezidints djåze del påye, on l’ towe. Ossu, merci Bush. Gråce a vos... (biestreyes), nos avans les Dayech so les rnos.
So les hôteurs di Serè, al Nouveye, mi shonne-t i, ou bén a Hinri-Tchapele, pormoennez vs on djoû ås pîs des blankès creujhes [creus, croix] des aites militaires amerikinnes. Loukîz l’ ådje des djonnes sôdârds américains k’ ont dné leu veye po nos liberer des Nazis. Padzo les creujhes, blancs ou noers ont l’ minme coleur. C’ est Piron parey.
O ! dj’ a cnoxhou, avou, deus djonnes sôdårds almands, sins rprotches. Hans et Wolf. Il avént a poenne 20 ans et mi set (dji raconte ça dins l’ tecse « Li ptit caporå »).
Mins vochal li liberåcion, les G.I. et Glenn Miller. Kéne afwaire a Lidje ! Nos bondius, c’ esteut les tchåfeus des camions G.M.C. Des noers negues, såf respet.
Cwand i s’ arestént po fé ahote, nos gripéns bén vite e leu cabene, å costé do sôdård. l n aveut todi a poirtêye ene boesse di råcions five in one (cénk e-n onk). On-z î tchoezixheut çou k’ on voleut: des tchikes-gomes, des ptitès boesses di tchâr, et minme ... des capotes inglesses ki nos parints, tot come nozôtes ‒ såf nos grandès cuzenes ‒ prindént po des balons a gonfler.
Les sôdârds nos ârént dné Lidje et Hu. Nos poléns minme kipougnî leu bea ptit fizik, distcherdjî, eclawé inte les deus sidjes. Si nos dnént i d’ bon cour les belès essegnes e coleur di leus mousseures.

Nozôtes, les Walons

Sol brocante di Sint-Foyin, cwand dj’ ô on cama ki m’ dit : « Fât-st arawer, n a nosse Djudla ki toûne a Kinchassa. », dji lyi respond :
« Ass veyou li bea rislet et les beas grands ouys des ptits efants ås crolêyès tiesses? Come on-z a bon d’ les aconter ! Ni roveye nén ki m’ popa esteut Flamind et ki l’ tinne provneut do Nôr di l’ Itåleye. »
Deus tiesses di hoye, djans ! Mins deus araedjîs Walons.

Françwès Nyns
sipoté Tchantchès d’ å Bierleu, li 15 di may 2016