Octôbe 2017 el Catalogne

On deur ahan po Pouchdomont

Dins l’ Rantoele 83, nos vos cåzéns des ptits payis avou on lingaedje ey ene tuzance da leur, mins k’ estént eclôs dins des pus grands estats, di cåze d’ etrevéns istorikes. Cwand i s’ volèt rdislaxhî, pår democraticmint, i veyèt les set croes.

C’ est çou ki s’ passa avou l’ Catalogne. Do tins da Franco (1940-1975), on lzî disfindeut minme di scrire leu lingaedje. Ci n’ est k’ al fén, diviè 1970, ki les prumirès bindes d’ imådjes e catalan ont stî eplaideyes sins rujhe.

Après, avou l’ ahivaedje des contrêye otonomes (1979), li catalan a divnou on lingaedje di gazete, di posse, des spitchs politikes et des lives.

Les traeyincieus avou
Li catalan ravike d’ on plin côp, copurade ki les industriyels et les traeyincieus [hommes d'affaire] lyi dnèt on sfwait côp d’ mwin. Les pårtis dislaxhiveus vinèt sovint al tiesse des vôtaedjes. Tantea k’ i tuzèt cråndimint å dislaxhaedje foû d’ l’ Espagne.
Oyi, mins nén pus...
nåcionålté <> nåcion
Et dire ki tot ç’ herleme la a vnou a cåze di ces deus mots la. Come dji vos l’ di.

Li mwaisse lwè so l’ otonomeye di 1979 ricnoxhe li Catalogne come åyant ene nåcionålté a pårt. Mins dins ene novele modêye di 2006, divins l’ adrovaedje, il est dit ki l’ Catalogne, c’ est ene nåcion.
Nén binåjhe, les cis do Pårti populaire (droete wårdiveuse). Ey ataker l’ Catalogne divant l’ tribunå del mwaisse lwè [cour constitutionnelle].
Ci-cial va rinde si djudjmint e 2010, tot côpant l’ poere e deus. Les Catalans ont l’ droet, istoricmint, di s’ lomer « nåcion », mins ç’ mot la n’ a nole valixhance lweyåle [légal]. Mins 14 hagnons [paragraphes] ont stî djudjîs foû-lwè.

Les « PP » (Partido Popular), nén co binåjhes, metît des xhames el voye do govienmint catalan cwand i decida d’ enonder on referandom di dislaxhaedje. Il årént polou fé parey k’ e li Scôsse, et fé campagne disconte li dislaxhaedje. Les Catalans n’ ployît nén, et fé leu vôtaedje (oyi a 99 åcint, po 33 åcint d’ vôteus). Mins li monde etir a polou vey des sinnes di policîs ki dôpinént des djonnes et viyès djins po ls espaitchî d’ avni dins les buros d’ vôte.
Adon-pwis, mete el cadje tot l’ govienmint catalan k’ aveut decidé do referandom. Et cwate des minisses, avou l’ prezidint Tchåle Pouchdomont (Carles Puigdemont), fé on ptit voyaedje d’ amisté a Brussele. Sol pî sol tchamp, l’ Espagne dimande al Beldjike di les ramasser et d’ elzî ravoyî. Vos såroz cwè mî k’ mi asteure, cwand vos léroz ci papî cial.

Les Walons dijhnut l’ leur

Tiri Domont : Les Catalans sont-st ene miete come les Flaminds. Come i sont pus foirts economicmint, i volnut awè råjhon tot seus. Dj’ a ene måjhon låvå et dji cåze sovint avou m’ vijhén. I pinse k’ i cåze francès, mins... come on Basse espagnol. Il a stî binåjhe li djoû k’ on a acsegnî e catalan dins les scoles. C’ est çou k’ i vleut.
Pablo Sarachaga : Madrid a dné des droets al kiminålté d’ Valince k’ elle a rfuzé ås Catalans. Vormint po fé araedjî Bårçulone. Les Valincyins djåzèt èn accint do catalan, mins k’ i lomnut « valinçwès » (po n’ nén esse prins po des diåles-e-coir pa les Unionisses). El contrêye, gn a eto bråmint di castiyan-cåzants ki sont disconte tos les lingaedjes coinreces.
Hervé Haskin (prof a l’ ULB, so l’ RTBF) : Li Pårti Populaire si moenne sovint a môde des frankisses.
Tchåle Mitchî (prumî minisse bedje): Li margougnance, come tins do referandom, n’ amoenne rén d’ bon. Tchén fwait tchén. Sayîz d’ vos etinde politicmint.

Elio Di Roupo : Ci sereut ene biestreye di revoyî Pouchdomont e l’ Espagne, la k’ i riskêye 20 ans d’ pote, adon k’ il a stî relî democraticmint, et fé djusse çou ki lyi shonnéve bon po s’ payis, dj’ ô bén : nole griyeuse fåte penåle.

Et les nén-Walons.
Cwand on lét les reyaccions des moenneus politikes totavå l’ Daegne, on voet ki les grands payis sont sovint d’ acoird avou Madrid. Mins end a bråmint dpus ki criyèt herleme disconte do bôreataedje des vôtants.

Ene ki dji rtén: li cene d’ on pårti dislaxhiveus di Silezeye : « L’ Urope divreut awè des rîles po des sfwaitès sitouwåcions. Si djanfotisse va co aparfondi li manke di fiyate des citweyins uropeyins disconte des institucions di l’ UU. »
Hervé Haskin aveut dit cåzu parey dins l’ posse.

Il ont co dit
Hervé Haskin : L’ Urope si moenne come on rtourneu d’ cazake. Cwand gn a on payis ki n’ respectêye nén l’ democraceye e l’ Afrike u e l’ Azeye (metans vini maker des djins k’ alèt vôter), ele va totshûte criyî Barabasse. Cial, paski c’ est l’ Espagne, rén ! Nén ene rimarke sol manire di fé do govienmint cintrå.
Tiri Domont : Minme ådvins des payis d’ Urope : l’ ôte djoû, Jean-Claude Juncker, tot serant l’ mwin do prumî minisse Orban di Hongreye, lyi djha: « bondjoû, monsieu l’ dictateur ! ». Et l’ Raxhoy, lu, i n’ l’ est nén ?

Madi d’ Orcîmont : Pouchdomont a dandjreus tchoezi l’ Beldjike, paski c’ est l’ NVA ki goviene, et k’ zels ossu ont håsse di liberté. Les Catalans ont i fwait berwete avou leu referandom ? Nén seur ! El politike, sovint, les lwès sont vite distournêyes et pu stårêyes. Mins tot loucant çou ki s’ a passé el Catalogne avou l’ lingaedje, on s’ prind a rever. Metans k’ ça nos arive on djoû. Nosse catalan, da nosse, c’ est l’ walon. S’ i rsereut a l’ oneur, po bén mostrer nosse provnance, ké bea tåvlea ! Schoûter des ptits efants berdeler avou leus parints e walon. K’ è djhoz ?
Martine Mahin : C’ est l’ vraiy ki, po fé des poliglotes, gn a rén d’ té k’ leu sistinme. Tot li scolaedje s’ î fwait e catalan. Insi, li feye del cuzene di mi ome (i dmorèt a Bårçulone) cåze catalan e scole, castiyan avou s’ pa, et francès avou s’ mame.

Lucyin Mahin, li 17 di nôvimbe 2017