Loumoumba et mi, II

Eternåcionå / Istwere / Beldjike

A fiesse d’ indepindance do Congo, li 30 di djun 1960, Patrice Loumoumba fijha on spitch haeyimiveus [haineux] la k’ i n’ mostréve ki les mwais costés do colnijhaedje [colonisation].

*

Totsu rade, ça a stî l’ disdut dins l’ payis. Nozôtes, dj’ esténs a Boucavou, ki fourit evayi pa des tropes di milicyins k’ î moennît herleme. Tantea ki les sôdårds di l’ ONU ont fwait evacouwer les blancs tot trevåtchant l’ laetche Tanganica. Mins tot passant dizo l’ dierin pont, les milicyins da Cachamoura saetchént après nozôtes a côps d’ fizik.

Roviance

Vo nos rla don el Beldjike, et pitchote a midjote, ces laids cwårts d’ eure la ont stî rovyîs. Dji n’ wårdéve come sovnances ki les bons moumints passés dins les viyaedjes lon did tafwait, la k’ les Congolès estént nos vraiys soçons. Nozôtes, on n’ côpéve nén les mwins des noers, on n’ elzès traitive nén d’ tos les nos, ni les dôpiner a côps d’ baston, come les cis do trévéns do Congo Yopôl II avént kécfeye fwait. 

Rinde bon dvwer a Loumoumba el Beldjike ?

Pu, on bea djoû, dji n’ sai pa ké sint, gn ava-st on mayeur, pu èn ôte, pu co èn ôte ki decidît di fé oneur a Loumoumba. On loma ene rowe a s’ no a Tchålerwè. On lyi meta ene plake so li dvanteure del måjhon d’ veye di Mont. On lyi fjha ene posteure a Brussele. Et onk des borguimwaisse låtchî : « dji so fir ki c’ est l’ prumî côp k’ on rind bon dvwer a cist ome la el Beldjike. » 

Dji boléve. Rinde bon dvwer a èn ome ki ses sôdårds avént saetchî so mes efants, ça m’ shonnéve foû scwere. C’ est çou k’ dj’ a scrît å mayeur k’ aveut enondé l’ idêye di posteure. Mins dji m’ a fwait rbouter. L’ afwaire aveut stî decidêye a l’ unanimité do consey cominå, pår avou les vwès dl opôzucion.

Dins les scoles

Adon-pwis, e moes d’ setimbe, tot drovant mi éndjole, dji tome so on dessén fwait pa les scolî·resse·s del sicole Guy Cudell di Brussele. Patrice Loumoumba esteut dessiné astok di Nelson Mandela. Ci tåvlea la aveut stî fwait al fén d’ on rcweraedje sol colnijhaedje, eterprins tins dl anêye di scole 2017-2018. Li prof di francès, nosse dame Sabiha El Yousfi, l’ aveut minme prezinté divant l’ Pårlumint.
Co on côp, dj’ a potchî dins mes gobeyes. Et prinde li pene po scrire al minisse Marie Martine Schyns po critiker cist ovraedje la. Les dates ni sont nén tertotes djusses. Les tites ni respondèt nén å contnou. Les respondas (intervious) et les rcwerances dins les egurniyaedjes (årtchives) sont fwaits sins spepieusté. Avou, come rizultat ene crawieuse avuzion di l’ istwere do Congo bedje et da Patrice Loumoumba.

Po les Congolès d' Beldjike...

– mins nén tertos – Loumoumba a divnou on mårtir et on hero Mins pocwè, dabôrd, ont i vnou dmorer dins on payis ki leu-z idole veyeut evi [détestait] ?

Christiane Blanjean, k’ a scrît lanawaire on live e francès so ses sovnances do Congo.

© Licince GNU di libe documintåcion, 2019