© 2015, Josse Goffin, Regard à gauche

On Noyé d’audjoûrdu…

Jules Hérix, R. N.

Texte

Vos l’ savoz bén, don, qu’on va bén rade fièster mès-ans. Tos l’s-ans, c’è(-st-one grande fièsse qu’on faît po l’ Noyé..., èt i m’ chone qui ç’ sèrè co parèy cite anéye ci...Waîtîz come tot l’ monde vore dèdja dins lès magaséns po trover totes sôrtes di bistokes. Nén moyén d’ passer à costé avou tot ç’ qu’on nos tane lès-orèyes au posse èt al tévé...

Ça m’ faît vraîmint plaîjî dè veûy qu’au mwins on côp par an i-gn-a dès djins qu’ sondjenut à mi... Portant, i m’ chone qu’au djoû d’audjoûrdu, i-gn-a branmint qu’ ont rôvî tot ç’ qui dj’a faît por zèls,...on fait l’ fièsse pace qui c’èst dins lès-ûsances mins, au pus sovint, sins pus soyu douvént...

Dji m’ sovén bén qu’ l’an passé, li vént-quate di décimbe al nêt, on-z-aveut mètu su pîd one grande rinchinchote dins one maujone à Nameur. Tote li famile èsteut là, dès grands, mins ossi one drigléye di r’mouwants-èfants. Su l’ tauve dèl bèle place,
on-z-aveut mètu totes sôrtes di boûnès-afaîres po bwêre èt po mougnî,... èt gârni on grand sapén qu’on-z-î aveut pindu dès clignotantès lumerotes di totes lès colêurs. Èt pa pad’zo, one banseléye di cadaus, tortos au pus bia...

Adon, savoz bén qwè ?... È bén, i-gn-a qu’ mi qu’ n’aveut nén stî priyî !... Dj’âreu d’vu yèsse li prumî à fé v’nu,... mins i chone qui pèrson.ne ni s’a sov’nu d’ mi. D’alieûrs, dji n’aveu d’dja pont yeû d’invitâcion !...Èt ç’ djoû-là, i m’ont lèyî en d’foû èt r’claper l’uch à m’ nez... Dj’âreu tant v’lu yèsse là portant èt fé l’ fièsse avou zèls !...Mins, po dîre li vraî, ça n’m’èwâre nén. Dji c’mince à m’rinde compte qui, dispeûy saquants-anéyes, lès-uchs si rèssèrenut pad’vant mi, onk après l’ôte...

Adon, maugré qui dj’ n’èsteu nén priyî, dj’a tot l’minme dècidé d’ m’aler mète avou zèls, sins pont fé d’brût, sins m’ fé r’mârquer... Dji m’a stî achîr dins on cwén, sins boudjî... èt dj’ lès-a bén r’waîtî...

Tot l’ monde s’a mètu à bwêre, ... dèl bîre ou do vén po lès grands èt do spa po l’s-èfants. I-gn-a dès cias qu’ èstîn´ one miète bèrzinques èt d’s-ôtes qui fyîn´ li bièsse èt rîre tortos come dès bossus di totes leûs bièstrîyes... Il î fieut vraîmint fwârt gaîy...

Adon, ad’vinez quî ç’ qu’on-z-a vèyu intrer ?...On gros laîd bolome avou one blanke baube, one rodje cote tote cafougnîye èt on grand bonèt à flotche qui lî tchèyeut su l’orèye... I s’a stî tot
d’ sûte achîre su l’ divan èt s’ mète à s’t-auje, come one saquî dèl maujone !... Èpwis, tos lès-èfants ont c’mincî à couru autoû d’ li èt criyî come dès-arèdjîs : Pére Noyé ! Pére Noyé !... come si l’ fièsse, ci sèreut por li...

À méyenêt, tot l’ monde s’a mètu à s’ rabrèssî... Dj’a ratindu qu’i-gn-eûye onk qui m’ vègne prinde dins sès brès..., mins savoz bén qwè ?... è bén, i-gn-a pèrson.ne qu’a v’nu d’dé mi!...Adon,
on-z-a c’mincî à fé one discandje avou tos lès cadaus. Pwîs, tot èfoufîs, i s’ont mètu à lès douviè onk à onk... Quand tot a stî disbalé, dj’a tapé on côp d’oûy po veûy, si d’astchèyance, i-n-âreut yeû one saqwè por mi !... I n’è d’mèreut pus nén onk pad’zo l’aube...

Qu’ârîz faît, vos, si l’ djoû qu’on fièstéye vos-ans, tot l ’monde s’âreut yeû discandjî dès cadaus èt qu’i n’âreut d’dja nén yeû onk por vos ?... Po fini, dj’a compris qu’on n’ mi v’leut nén ,... djè l’s-a lèyî là... èt ’nn’aler su mès bètchètes, sins pont fé d’ brût...

Mins, maugré tot, dji lès veu co tortos ossi voltîy !...



Jules Hérix, R.N., (Longchamps – Lontchamp)

Metadata

Auteurs
Jules Hérix, R. N.
Sujet
Récit
Langue
Wallon (Longchamps - Lontchamp)