© 2015, Josse Goffin, Regard à gauche

Li nêt do Sabat

Julien Noël

Texte


[ en wallon namurois / walon d’ Nameur èt avaur-là]


Clop, clop !
Gn-a trwès macrês vêlà dins l’ bas tch’min
Qui piyotenut, èt leûs sabots d’ Flaminds
Brûtîyenut come on keûr d’aurdjouwant.
I faît si nwâr qu’on s’ crwêreûve en d’dins
Di s’ cwârps d’ôsêre – c’è-st-one nêt d’ brigands,
One nêt d’ misére, one nêt qu’ li Malin,
Uke totes sès djins èt lès mèt è rangs,
Lès bistoke – c’èst l’ sabat do Mèchant !



Plotch, plotch !
One pitite bauchèle rote su l’ pîssinte ;
Èle faît l’ tchèt, èlle èst contraîre aus sintes.
Mins gn-a dès broûs : nosse pitite macrale,
Portant spitante, avou l’ diâle dins s’ vinte,
Tchaît dins one astaurdjîye. Sès sandales,
Èle lès-a pièrdu – lès deûs, sins minte ! –
Èt gn-a dès traus plin sès tchausses di lin.ne.
Qués bèlès djambes ! Au sabat, c’èst l’ rin.ne…




Toc, toc !
Nos macrês ont couru come dès leups :
Vo-lès-là à l’uch do vike-tot-seû.
L’ome, i d’meûre dins on vilin cayon
Qui – drole d’afaîre ! – èst pus grand en d’dins.
Adon, i sont po l’ mwins´ deûs trwès cints
Qui s’ prèssenut vêlà pad’vant l’ Démon.
(C’è-st-insi, i-gn-a ni stik ni broke,
Faut-z-aler bètchî l’ cu do Vèrboc !)




Miom´, miom´ !
Quand tot l’ monde lî a rindu bon d’vwêr,
Èt divant d’ènn’aler fé prandjêre,
Li Nwâr Tatiche done on r’pas d’ dicauce :
Dès dwègts d’ bèguènes fwârt apétichants,
Dès gnognots mwârts sins batème al sauce…
Lès macrês, i s’è font pèter d’vant ;
Djans ! Si èle n’abise nin su l’ momint,
Sûr qui li p’tite rin.ne n’aurè pus rin !





© Julien Noël, revue Les Cahiers wallons - Rèlîs Namurwès, n° 3-2022

Lexique
Macrê : sorcier (plutôt liégeois)
aurdjouwant : géant de cortège
fé l’ tchèt : faire l’école buissonnière
tchaîr dins one astaurdjîye : tomber évanoui
vike-tot-seû : ermite
Vèrboc : espèce d’être mythique malfaisant
Tatiche : Satan / gnognot : bébé
djans : interj. marquant l’agacement (plutôt liégeois)





Metadata

Auteurs
Julien Noël
Genre
Poésie
Langue
wallon namurois. walon d’ Nameur èt avaur-là
Relation
Les Cahiers wallons - Rèlîs Namurwès n°3 - 2022
Droits
© Julien Noël, revue Les Cahiers wallons - Rèlîs Namurwès, n° 3-2022