Li Beldjike dins l’ penin

Deus bombes petnut a Brussele, les metros rôlnut

Mårdi l’ 22 d’ måss. Après awè fwait on gros betch al sitåcion a m’ båshele ki va passer s’ djournêye mon ses grands-parints, dji rmonte dins l’ trén omnibusse viè Brussele. So m’ sûtifone, mi bele-mame m’ evoye on messaedje : « Savoz k’ i gn a yeu des esplôzions a Zaventem ? » ?

On djoû come èn ôte ?

Gråce a l’ internete axhlåve, dji discovere k’ i gn a yeu des esplôzions a l’ areyopôrt. C’ est fwait, les sôdårs di l’ Estat islamike on fini pa fé peter leu hinne amon nozôtes.

Dji so co dins m’ trén aviè L’ Elpe [La Hulpe]. Dji pôreu co dischinde do trén e raler bouter al måjhone, come nos avéns tertos fwait å moes d’ nôvimbe, come on nos l’ aveut dmandé. Continouwer, mi di dj', ça sereut lzî dner l’ baston po m’ fé bate. Mins dj’ dimeure biesmint e trén, sins tuzer, disca Brussele-Schumann.

Drole di rsinta : li ståcion est a pô près vude. Il est 8 eures 45. Dji prin m’ velo å pî do Consey Uropeyin, mete e-n alaedje li ptite camera ataetcheye å guidon (on n’ sait djamåy...) et triviersî set kilometes del veye a velo. Seur k’ i n’ fwait nén seur avår ci. Les hoûlåds boerlêynut tocosté. I n’ si passe rén. I fwait påjhire come s’ i gn aveut on moirt el måjhone.

Aviè 9 eures 20, a l’ intrêye di m’-n ovraedje, l’ Estat-Madjor di l’ Årmêye bedje, dji rintere sins pus di controle ki m’ cwåte magnetike po drovi l’ bårire. On terorisse såreut rintrer sins trop d’ rujhes. Li gåre [garde, sentinelle] est al coete dins s’ cahoute. Dazår k’ i n’ a nén yeu d’ ôre. Portant, ene troejhinme bombe a peté dins l’ metro, a Maelbeek dispoy vint munutes.

Tote li djournêye si passe insi, sins informåcions del pårt di nos tchîfs. Nos estans portant å mitan do disdut.

A 14 eures, nos rçuvans infén l’ prumî messaedje oficir : nos plans ataker a-z eraler al måjhone et rvini bouter dmwin. Rén d’ ôte.

Ene colegue flamindje mi moenne e-n oto disca Lovén, la ki dj’ prin l’ trén direccion Åve. Dj’ î rescontere deus Francès et on Camrounès k’ estént a l’ areyopôrt tins di l’ esplôzion, dins l’ zône di tranzite. I saynut d’ ridjonde li France avou l’ trén. On Francès m’ raconte : « Ayir, dins èn areyopôrt afrikin, nos avans stî deus côp pus controlés k’ a l’ abitude, divant d’ prinde l’ avion viè Brussele. On ns a espliké k’ ça aveut stî dmandé pa ls otorités bedjes et francesses. »

Gn aveut i des senes k’ ene sacwè s’ aprestéve a Zaventem ? Nos siervices savént i kel risse aveut crexhou ?

Al nute, dji rtrove les minnes. Ki fé d’ ôte ki d’ si boere on boun Ôrvå et s’ magnî on bon soper. Profiter del vicåreye, si fé do bén.

Åreut on polou... ?

Nos apurdans ki m’ sour, passêye a Schuman a 9 eures, a oyou l’ esplôzion. Elle est tote drole. Nos apurdans eto kel matante di m’ copagneye est a l’ ospitå. Elle esteut dins l’ metro a Maelbeek. Ele ni va nén mori mins riskêye di dmorer aveule pol restant d’ ses djoûs et n’ pus sawè bouter. Leye eto, après s’ awè fwait operer cénk ou shijh côp, si mosterrè ureuse di viker. Djoyeuse d’ esse co la.

C’ est a ç’ moumint la k’ on s’ dimande çoula : minme s’ on n’ sait nén arester ene sakî k’ si vout fé peter, n’ åreut on nén savou houwer les moirts do metro ?

Ene eure et dmey di passé sins k’ ene otorité ni decide d’ arester les metros, les trams, les busses et les tréns dabôrd k’ on saveut comint ça s’ aveut passé a Paris. Kéne diferince avou çou ki s’ a passé å moes d’ nôvimbe, la k’ on-z aveut seré minme les scoles sins k’ i gn åye on risse di ç’ costé la. Et dmander åzès djins d’ dimorer e leu måjhon !? Ni sereut ç’ nén diner ås terorisses li baston po fé bate nos djins ?

Cwand on cnoxhe les måleurs des ôtes...

Sins awè d’ response, dj’ a tuzé adon a tos les ôtes pôvès djins so nosse Terre ki sont djostés pa les bôreataedjes des gueres et do terorisse : å Nidjeria, e-n Irak, e l’ Sireye, å Liban, e l’ Libeye, e-n Edjipe, e l’ Palestene, e-n Israyel, å Congo, e l’ Chine, e-n Oucrinne, e l’ Corêye, e-n Afganistan, å Soudan et co pus lon. Et dji m’ a dit ki ns n’ esténs nén si må metous, nozôtes, po fini. Et n’ nén rovyî k’ dins nosse monde, ene veye a Brussele, Paris ou Tel Aviv våt 50 veyes dins on payis arabe ou d’ Afrike.

Ene veye c’ est ene veye, dabôrd, ostant fé tot çk’ on sait po n’ nén awè des moirts et des mesbridjîs po rén, cwand on sait. Et la, m’ shonne-t i, on saveut.

Jean Cayron, li 29 di may 2016