© 2015, Josse Goffin, Regard à gauche

Ecolodjeye: Baloujhnaedje sol COP 22

Lucyin Mahin

Texte

Les gaztîs, come ene seule djin, préjhît li COP 22. Li prumire COP eviè Nonne [vers le sud] drova poites et ouxhs a Marakech (Marok) troes djoûs après l’ aveurixhaedje [ratification] des acoirds di Paris del COP21. Bon côp po ene COP k’ årè l’ cope d’ Afrike.

                                                                *

COP vout dire, e-n inglès, conferince des pårteyes (C. Of the P.). Dj’ ô bén, les cenes egadjeyes divins les acoirds tcherpetreces [convention-cadre] di l’ ONU so les candjmints do climat. Li plin sike [sigle, acronyme] sereut CdPATchONUCC. Ké dalaedje !

Gn ourit 195 payis po siner les papîs d’ Paris, inte di zels, pol prumî côp eshonne, les pus mannixheus del planete. Des k’ estént nawes po-z accepter l’ droet do djeu. Po l’ epufkinant CO2 par djin, i s’ adjixh di : l’ Ostraleye, les Estats Unis, l’ Arabeye Sawoudite, li Rûsseye eyet l’ Almagne.

Cwand on l’ dit, on l’ fwait

Pus grand k’ el fôre di Libråmont, nosse COP 22 ! Avou, tot do long del voye po s’ î rinde, des banires avou dins les cénk lingaedjes corants do Marok, li dvize « bouter »; dj’ ô bén : adji, nén todi berdeler.
Foiski, disk’ asteure, mes omes, i n’ ont ponou k’ des belès paroles. Ci n’ est nén l’ tot d’ aveuri èn acoird. Si fåt i co mete si mwin e s’ boûsse po fé rexhe les çanses po-z aidî les pôves payis vini foû di spexheur [émerger économiquement].

Afrike, li ptit k’ on spotche

Ces pôvriteus payis la, end a ene masse e l’ Afrike.
Dins on rapoirt sol coixhiveusté [vulnérabilité] des payis divant les disduts climatikes rawårdés pol 21inme sieke, li buro ås studias inglès Maplecroft a metou set payis afrikins dins les dijh les pus mancîs do reschandixhaedje del Daegne (Siera Leyone, Nonne-Soudan, Tchad, Nidjeria, Cintafrike, Eritrêye, Etiopêye).

Portant, l’ Afrike n’ est waire responsåve do disbrôlaedje di nosse tins. Nén ddja 4 åcint di l’ enairixhaedje d’ emacralants gåz [émission de gaz à effet de serre]. Avou ça ki, c’ est dins li dzo-tere di l’ Afrike ki les ritches payis (les Chinwès tot pareys) vinèt poujhî çou k’ il ont dandjî po leus mannixhantès industreyes: uraniom, coltran, petrole (Nidjeria, Angola, Aldjereye, Libeye). Dji mousse e t’ måjhone, dji t’ hape tes ritchesses, et dji t’ revoye des pufkenes !

Ridnez nos djusse on pô des çanses !

Ca gn a bråmint a fé e l’ Afrike. Po l’ agricoûteure, po on prumî. N’ a fok deus åcint des teres afrikinnes ki sont raiwêyes, dabôrd k’ end a 25 % k’ el pôrént sey. Mins on s’ disbåtchreut bén do waire d’ asteme ki les decideus climatikes prindèt po l’ Afrike et ses coûtiveus. Å prume, n’ a ddja ki 4 åcint di leus buddjets ki sont-st alouwés po les cinses et les cinsîs (pattavå les payis). Et, tot conté tot rabatou, l’ Afrike ni rçût ki 5 åcint des dispinses pol climat.

Agricoûteure: prumiristé

Tocosté sol COP22, gn av des standes po mostrer les avanceyes di l’ agricoûteure d’ Afrike. Pordjet po rfé do biyogåz avou les bigåds, les flates et les riketes d’ abatwer (Marok); po fé do biyomazoute avou d’ l’ ôle di pålmisse (Congo-Braza), et hay vos nd åroz.
Mins çoula, c’ est l’ ådjeu des grossès societés agrowindustriyeles. Po les ptitès djins, gn a eto des vudindjes. Come li permicoûtivaedje [permaculture] po rfé des ptits cortis. Ou des coperatives po vinde direk a l’ atchteu des rcwerous prodûts come l’ ôle d’ argane ou les yebes ås maladeyes, rewalpêyes dins des saetchots dins les regues di l’ etictaedje modiene.

(...)

Nén fé l' diåle pus noer. k’ i n’ est.

Gn a eto des clintchas foirt préjhåves [tendances favorables] pol moumint e sacwants payis d’ Afrike. Insi, li nouzome cintråle å solea di Warzazate. Cénk ectåres di panes å solo ki vont tchåfer d’ l’ aiwe et fé del wapeur, ki va-st enonder ene tourbene electrike. Et, shuvanmint, esse capåbe di produre do corant co troes eures après solea-djus. Ele kimince a roter dispu ciste anêye. Eyet n a ddja ene pitite sour ki les travos vinèt d’ esse sitrimés lanawaire, lomêye Nor-3 (Loumire-3). La, ci serè co ene ôte tecnolodjeye. Des muroes plantés e rond, ki vont risclati l’ loumire eviè ene hôte tour metowe å mitan d’ l’ aireye [périmètre], et fé fonde do sé ordinaire (NaCl). Ki rfrè do corant tot rindant s’ tcholeur djus dins l’ tour, et fé d’ l’ electrike co pus lontins après l’ anuti k’ l’ ôte.

Oyi mins nonna !

Totes ces belès pinsêyes la k’ on-z a oyou a Marakech serént cobén anixhilêyes [réduites à néant] pa deus sacwès ki dji vos va dire.
Po cmincî, li mopliyaedje del djin el’ Afrike, ki n’ baxhe waire mågré l’ enindjaedje do sida. A nonne do Sara, todi. (Dabôrd k’ e l’ Afrike bijhrece, il a bén discrexhou, divnant minme parey ås chifes di l’ Urope dins des payis come li Tunizeye.)
Si on porshût come asteure, po 1,2 miyårds di djins ouy, gn årè motoit on miyård et dmey e 2030, et deus miyårds e 2050. Dj’ ô bén k’ i fårè deus côps dpus d’ amagnî. Çou ki dinreut 200 miyons d’ ebagants climatreces. Portant, dins nou stande, dji n’ a veyou del riclame po des programes k’ aidrént les meres afrikinnes a-z ehåyî li taeye di leu famile. Li sudjet sereut i divnou nén politicmint comifåt avou l’ avancixhmint des islamisses dins toplin des payis åtoû do Sara ? Dimander cwè, c’ est ddja ene miete î responde.

Li deujhinme aroke ki pôreut dihåjhiner [déglinguer] les belès paroles del COP 22, c’ est l’ novea mwaisse des Estats Unis ki n’ croet kécfeye waire ås ravådaedjes sol climat (trop sincieus po si ptite tiesse, motoit). Et k’ a ddja boerlé sacwants côps k’ i côpreut les subzides a l’ Afrike paski les cwårs evont dins les taxhes des dictateurs et leu nindjes di politikîs courtizeus. Dins les payis ki sont splawnés pa l’ abribance, todi [en déliquescence à cause de la corruption].
Et la – pôves nozôtes et les tchéns d’ tcherete ! – on n’ lyi pout nén dner toirt. Cwand on voet çou ki s’ passe dins des payis come li Gabon, li Bouroundi, li Congo-Kinchassa li Zimbabwé et l’ Aldjereye, la k’ les cis k’ ont l’ povwer ni volnut nén dner leu plaece ås ôtes [absence d'alternance]. Sins cåzer des payis sins nole moennance politike come li Libeye, li Nonne-Soudan, li Nôr do Mali, l’ Ess do Congo-Kin; li Cintafrike.

Al fén des féns...

Sorlon les djins des soces nén recwårlantes, gn a cwanlminme yeu des progrès a Marakech.
A Paris, c’ esteut djusse des sohaitaedjes di govienmints. Asteure, c’ est les moenneus politikes ki s’ ashidnut avou les soces di djins [societé civile]. Et mete les ponts so les î po kimint et cwand awè les liårds po les ptits s’ disfinde disconte des rujhes climatreces a vni. Dabôrd, les SNR ont dmandé l’ droet d’ esse mimbe des assimblêyes la k’ on decide des buddjets et leu dispårdaedje.
Les bankes zeles-minmes kimincèt a ofri des credits po des pordjets nateure-amiståves.
Ene ôte dimande des soces di djins, c’ est d’ saveur cwè et come wice ki les cwårs ki rexhnut pol climat evont. Disk’ asteure, ci n’ esteut nén clairmint eplaidî et controlåve [non transparent]. Dizo ci splinctaedje la [pression] des djins, les dispinses del « grosse machine » divrént esse bråmint pus veyåves, et les distoûnmints pus målåjheys.


Lucyin Mahin, li 18 di nôvimbe 2016

Metadata

Auteurs
Lucyin Mahin
Langue
Wallon
Relation
Revue Li Rantoele L° 80, ivier 2016-2017
Droits
Lucyin Mahin, 2017