© 2015, Josse Goffin, Regard à gauche

Les ptitès måjhons do Comitî

Lucien Collin
,
Lucyin Mahin

Texte

Dins si rlomêye tchanson « Les Sinistrés », riprinjhe pa Julos Beaucarne, Jean Baguet esplike k’ « après l’ guere, on a dit fåt k’ on s' mete / A rfé ene måjhon po les cis ki nd ont pus ».


Mins dins l’ province do Lussimbork, k’ aveut stî ravadjeye pa des teribes batreyes (Lochnô [Rossignol], Maissin, Poitchrece), avou broûlaedje di måjhon, on aveut ddja metou l’ mwin al palete (trouwale) tins del guere.

Rischoûtans Lucien Collin espliker li cas d’ Poitchrece.



Broûlaedje


Å matén del batreye di Poitchrece, les Almands estént si mwais k’ i s’ avént macsådé etur zels, k’ il ont broûlé tot l’ viyaedje. C’ esteut ossu po s’ loumer ås aireurs do djoû, et tchessî les Francès k’ i creyént k’ estént co avår la. C’ est po ça k’ il ont broûlé deus côps l’ tchestea, ki sierveut d’ cwårtî djenerå (i savént bén ki les oficîs n’ alént nén coûtchî).


Li « Comitî »


Dimandeu (Dm.) - Et pu après, po rbasti po les djins k’ éstént sins måjhon ?


Lucien Collin (L.C.) - Ebén come tot l’ viyaedje esteut broûlé, il a falou rlodjî les djins. Les paxhis et les cortis estént sacadjis. I gn aveut co pupont d’ biesses, pu rén do tot. I faleut nouri les abitants do voyaedje et les rlodjî. Po les rlodjî, il ont yeu li « Comitî di Scours Alimintåre do Lussimbork » (CSAL).
Il ont decidé di lzî basti des måjhons avou les pires k’ egzistént so les rwenes. Mins ces måjhons la n’ estént nén metowes so l’ eplaeçmint del måjhon k’ aveut stî målfouwêye [incendiée]. C’ esteut djusse a costé, soeye-t i dins on corti, padrî ubén sol costé. I nd ont rbasti a pô près ene trintinne.
Et il è dmeure co asteure 21. Et c’ est l’ viyaedje di Poitchrece k’ els a l’ mî metou e valeur. Paski ces ptitès måjhons la, end a co bråmint k’ ont stî transformêyes a gåraedje, a djîsse e viyaedje [gîte rural] u a ptit ovroe [atelier]. Ça fwait k’ elle ont stî bén wårdêyes.


Dm. - Mins end a dins des ôtes viyaedjes ?

L.C. - I gn a a Maissin, end a-st a Arbûmont, end as-t a Baranzi et a Rule, todi. Tchaeke côp, c’ esteut li comitî d’ sicours ki pårinéve ey aidî les sinistré a si rlodjî. Mins i n’ s’ ocupéve nén seulmint do rbastixhaedje; i s’ ocupéve eto do nourixhmint des djins.


Minires


Dm. - Pocwè k’ inte les pires, c’ est des rodjes djondaedjes ?

L.C. - Ça, c’ est ene sacwè so Poitchrece. Pask’ a Poitchrece, i gn aveut des minires di fier, divant l’ guere di catoize. Et il ont utilijhî les poûssîs del mene come moirtî. C’ est po ça k’ nouc côp so dijh, a Poitchrece, les måjhons ont des rodjes djondaedjes.


Dm. - Et ces minires la, c'esteut cwand k’ on tiréve å fier laddins ?

L.C. - C’ esteut dvant l’ guere di 14. Et gn a co deus beurs [puits de mine] k’ on pout co rsitouwer. Et les voennes dischindént 70 metes fond. Elle ont stî abandonêyes paski l’ minrê n’ esteut nén ritche assez. I l’ faleut tcheryî disca l’ gåre do tram ciddé å fond do viyaedje. Et li tram li moennéve a Mson [Musson]. C’ est la k’ il esteut traitî.


Dm. - Avou des beurs pareys, i gn aveut d’ l’ aiwe, e l’ ivier ?

L.C. - Taiss k’ oyi, poy k’ i dischindént a 70 metes. Et il avént astalé ene pompe po vudî’ aiwe. Et ciste aiwe la esteut rviersêye dins des « gofes ». Ces gofes la, c’ esteut des rixheas d’ saiwaedje ki monnént l’ aiwe disca l’ Almaxhe (èn aflouwint d’ l’ Aiwe di Lesse).
Et ces gofes la, elle ont stî rcatcheyes, asteure.s.


[Responda moenné pa Lucyin Mahin li 1î d’ awousse 2020, Rantoeles l° 95, l° 96.]

 

© licence de libre utilisation CC-BY-SA 4.0

 

 

Metadata

Auteurs
Lucien Collin
,
Lucyin Mahin
Sujet
Province do Lussimbork. Batreyes. Poitchrece. 1914. Beldjike. Istwere. Bataye di Poitchrece e l’ guere di 1914- 1918. 24 d’ awousse 1914. Viyaedje Poitchrece distrût
Genre
Entretien, récit historique
Langue
Wallon
Relation
Revue Li Rantoele n° 96, 1er trim-2021
Droits
© licence de libre utilisation CC-BY-SA 4.0