Cåzans d’ mes lijhaedjes

Les djonnes d’ asteure sont todi so leu sûtifone. I n’ lijhèt nén ddja dijh pådjes so tote ene anêye !

Tant k’ a mi, sins fé del tancami [quant-à-moi], dj’ a apris a lére des lives so m’ sûtifone.

Mes consieus

Dins nosse djermêye [génération], gn a bråmint des djonnetes et des djonneas ki rwaitèt «TikTok».
Cwè çki c’ est d’ ça po åk ?
C’ est ene rantoele di soçnaedje k’ a stî metowe so les fis pa les Chinwès. Elle est bråmint critikêye. Mins mi, dj’ end a d’ keure. Paski dj’ î sai trover raddimint çou k’ dj’ a dandjî.
Metans : des lives.
Avou ça ki c’ est vola ki dj’ a-st aprins l’ inglès. Tot schoûtant les videyos inglès-cåzants di des inflouwinceus. Neni, gn nén k’ des Amerikins so Tictok. Gn des djins d’ pattavå. Metans des Arabes, des Aziyatikes et des Uropeyins.
Bén seur, i n’ fåt nén schoûter k’ on seu inflouwinceu. Li ci ki n’ ôt k’ on son n’ ôt k’ ene clotche.
Mins rivnans a nos lives.
Come di djusse, les inflouwinceus vos vont atåvler des lives e-n inglès, paski c’ est l’lingaedje di ûtante åcint des tictokeus et tictocresses.
Divant d’ esse so Tictok, dji n’ saveu djusse ki l’ inglès di scole (dispu l’ cwatrinme primaire). Avou ça ki, deus ans å long ‒ dj’ aveu ene nouvinne d’ anêyes ‒ dj’ a polou shure les scoles di vacances d’ on Cinte Amerikin å langues. Çou ki m’ a arotiné avou l’ accint amerikin (foirt diferin di l’ accint britich di mes profs). Mins dji m’ a co bråmint amidré djusse e schoûtant les videyos so Tictok. Et responde tenawete.
Ça fwait ki dj’ m’ a sintou capǎbe di lére des lives dins l’ lingaedje Chespire.
Dji trouve ki ç’ lingaedje la a bråmint des mots po dire totes sôres di sintimints.

Kimint tchoezi ?

Dj’ a waitî les lives ki s’ vindént l’ mî [best-sellers]. Dji voe evi les romans a l’ aiwe di rôze, k’ i sont ddja dins les bresses onk di l’ ôte après dijh pådjes. Ça dvént rade ene istwere avou des sinnes ås cawetes et racawetes des pus pelantes. Dji n’ inme nén dpus les lives di sbarance [thrillers]. Ni l’ syince-ficcion.
Dji lé voltî des paskeyes ki s’ passèt dins l’ vraiy monde et a l’ eure d’ enute [temps présent]. C’ est insi ki dj’ a toumé so on live da Ana Huang, « King of wrath » (li rwè del mwaijhe oumeur).
Li mwaisse persounaedje, c’ est Viviane. Po les omes, c’ est Danté, ki poite on sfwait ptit no paski c’ est èn Itålyin. Li pere da Viviane, c’ est on novea ritche, dabôrd ki Dante vént d’ ene viye famile bordjoesse. Li pere a maryî si pus viye des feyes di foice dins l’ famile do rwè. Sifwaitmint, il vout maryî Viviane a Danté. Mins ces deus la sont todi higne et hagne, dispu les acoirdances.

Eyu l’ lére ?

C’ est nén l’ tot d’ tchoezi. I fåt co trover eyu l’ lére. Dj’ a cmincî so m’ sûtifone. Ca dj’ aveu trové li PDF do live so ene waibe lomêye « Ocean of PDF ». Mins dj’ a yeu vite må mes ouys a bignî so on ptit cwåré d’ waitroûle. Ça fwait : dj’ a decidé d’ atchter ç’ live la so papî. Mins gn aveut deus rujhes.
On live come ça, ça våt 250 a 300 dirams (25 u 30 uros), çou k’ est bråmint por mi. Deujhinmmint, gn a pont d’ livreye dins l’ viyaedje (do Marok) eyu k’ dji dmeure. Et minme e l’ veye, on n’ a motoit waire di tchance di trover on live e-n inglès dins ene livreye.

Mins l’ Bon Diu n’ avoye djamåy li fa sins l’ sorfa [la Providence veille sur moi]. Dji rwaitive les videyos d’ ene tictocresse marokinne ki cåze so les lives d’ inglès. Elle a bråmint des shuveus [followers] mins waire di comintåres (adon, elle a l’ tins d’ les lére). Dji lyi a dmandé wice k’ elle atchtéve ses lives. Ele m’ a dné li pådje Astagram d’ ene societé-djermon [start-up] ki vind des lives ricopyîs, meyeumartchîs. On n’ sait wice k’ i sont, mins il est scrît k’ i savèt livrer dins totes les veyes. Et on n’ paye k’ å moumint k’ on rçût l’ live (come ça, on n’ sait esse djondou).

Dins totes les veyes ? Åy mins mi, dins on viyaedje, sabaye ? Dj’ elzî a dné mi adresse et il ont dit k’ i l’ savént avoyî låvå (paski c’ est a costé d’ ene grand-rote di grand passaedje). Faleut djusse payî ene rawete di 2,5 uros. Paski ci n’ est nén zels ki vont livrer djusse des lives. C’ est ene ôte pitite societé d’ apoirtaedje a domicile di totes sôres di martchandijhes kimandêyes so les fis [en ligne].
Leu pris ? Ça dipind del sipexheur do live. Li minne fijheut 350 pådjes, po 9,7 €.
Gn a co meyeumartchî. Dj’ a trové d’ astcheyance li 4inme live del rîlêye, « King of sloth », po 6 €. C’ esteut dé on ptit boukinisse ki håynêye ses lives al tere, mins a Rabat.

Souzane Mahin (avou on côp di spale do mwaisse sicrijheu) li 22 d’ awousse 2024
© licence de libre utilisation CC-BY-SA 4.0 de la Fondation Wikipedia