Keûr a l’ ovradje

On dut travayè. K’ on l’ fèye avu gout,
L’ ovradje srè bin fête, èle srè co rkèrîe,
S’ on sondje a ç’ k’on fêt, on n’ dit nin : dj’ m’ è fout.
Ca lu travay pwate la marke du l’ ovrî,
Çu k’ i pinse, çu k’ i pon.ne, èst dsus, inscrit ;
Lu keûr k’ il î mèt, su n’ eûve èst signéye.
Et lu contintmint k’ i ‘nn-è rèssinti,
Tot a s’ travay, fatigues, eûres rôssiéyes !
Eûreûs du bin fè.

Cès bês momints du nôns grands ârtisses,
Cès bèles pintures, cès bèles postures k’ on vèt,
Leû ètat d’ âme è stî leû rèyussite.
K’ d’ amour èt d’ èsprit mètus po lès fè !
C’ èst co t’t-ossi vrê po lès-ôntes ovradjes,
K’ on fèye in tchmin, èn-ustay, in sabot,
K’ on s’ ûse o burô, k’ on sogneûche dès vatches,
On s’ î plêt èt on vint a bout dud tot.
Coradjeûs k’ on-z-è.

Lu travay ! C’ èst la ritchèsse d’ in payis,
C’ èst l’ ôjmince, la santè, la bone umeûre,
Lès-omes instrwîts èt lès-ovrîs unis,
Ont vite minè t’t-a fêt a bone tourneûre.
A pratikant, trovè co a rmédiè
Èstant êdè dès conuchances aprîjes,
Insi, l’ travay fêt todi vnu l’ progrès,
Dès bones idéyes ! Pourvu k’ v’ lès sayîche
Lu bon dmeûr’rè.

Tot c’ k’ èst fêt pa l’ bon Dieu èst mèrvèyeûs
Come on s’ vèt ptit a contimplant sès eûves !
Èles sont si plin.nes d’ amour. Po èsse eûreûs,
On dut êmè l’ travay. Fèjant-z-è preûve,
Dieu nos êdant, du bon keûr activant,
Tant k’ dj’ avans santè, tant k’ dj’ avans dès fwaces,
Èt sondjant l’ bin, dj’ aprindrans nôns èfants.
S’ la vîe èst coûte, ç’ n’ èst nin po k’ on s’ rapwasse
Mês su sacrifiè.

Pîre Djônsèf Dosimont
(wallon d’Arville)

Malêjis mots
Ojmince : aisance
posture : statue sculptée
rôssiè : augmenté en nombre, rehaussé
ustay : outil