Dès pîces du nös-ôteûrs su lès plantches
Pierre Otjacques
Texte
Dins nosse province, lu prumî trimèsse èst vrêmint l’ cé du tèyâte walon û gômès; bin chûr, kékes troupe du nôrd alôrdjichèt la sêzon, an cminçant a djouwer an déçambe, pou fini ou mwès d’ fèvrî…
C’ è-st-ène boune idêye du leû pôrt, èt dj’ è profîtans bin.
*
Malèreûsmint pou nous-ötes, dju mankant du scrîjeûs d’ pîces du tèyâte, èt min.me du scrîjeûs tout coûrt! Èt avu la mwârt du nosse soçon René BRIALMONT, lu voûde s’ agrandi co. Dj’ avans surtout dès bons ratoûrneûs, ki fjèt la bzougne tchèke anêye pou leû troupe. Ca, k’ èst ç’ k’ on djouwe souvint dins nös sales?
Èh bin, su la kinzin.ne û pa dès cöps la ptite vintin.ne du troupes ki djouwèt tchèke anêye avô ci, on djouwe dès pîces d’ ôteûrs dès provinces vèjines, û bin dès pîces francèsses ratoûnêyes dins nosse walon.
Nös ratoûneûs tchwâzichèt l’ pus souvint dès pîces da Christian DERYCKE, èn-ôteûrs a succès d’ Mouscron. I scrît sès pîces an picard du ladrî, èt an francès, ca il è brâmint ossi d’ plêji, a vèy sès pîces djouwêyes dins mwintes sales dins l’ lingadje da Molière.
Sa pène court ôjimint su l’ papî, adon, il è dja scrît, dul fin dès-anêyes 80 jusk’ asteûre, ène trantin.ne du pîces, c’ èst tout dîre! Dès troupes du nosse province lu djouwèt tchèke anêye dpûs lontins, tûsez ôs «Ceux d’ Valansart» ki l’ djouwèt pou l’ vintime cöp.
A costé d’ ça, lès troupes du nörds djouwèt vlètî dès pîces d’ ôteûrs lîdjeûs, ki scrîjèt dins leû walon: l’ èst-walon. Adon kékes troupes, come çute anêye ci, Vèskèvèye û l’ Vâ d’ Chavan, purnèt dès pîces d’ ôteûrs francès, ratoûnêyes dins l’ walon d’ leûs contrêye.
Mês i dvèt awèr l’ ôtorisâcion dès scrîjeûs, èt c’ èst pa dès cöps malôjî.
Dju tûze a ène troupe ki vlot djouwer, la kékes anêyes, ène pîce sucrîte pa Josiane BALASKO…
Èh bin, i n’ ont jamwês oyu l’ ôtorisâcion du dame Josiane, pace ku pou lèye, la troupe n’ astot nin assez counûe ; èle nu lêche nin djouwer sès pîces pa dès-amateûrs!
*
Mês la boune surprîje du ç’ sêzon ci, c’ èst k’ cate troupes ont djouwé dès pîces d’ ôteûrs du nosse province! Vla vrêmint ène boune nouvèle!
Oneûrs ôs dames coume on dit, èt al pus djon.ne si vous vlez bin: Virjinîe DEREMIENS du Juseret (Vaux-sur-Sûre), ki djoûwe èt ki scrît pour «Les Arlequins de Bercheux» ; avu «On-ârtike dins l’ gazète» an 2 akes, èlle èst dja a sa catrime pîce dpûs 2013.
Henri HARDENNE du Grimbiémont, èst mèteû al sin.ne dpûs mwintes anêyes pour l’ troupe «Lès Pwèrteûs d’ djoye» du Harre-Manhay, avu «Rin a signaler» an 3 akes, djouwêye fin mârs, i ‘nn-astot a sa trwâjime pîce sucrîte, proficiat!
La troupe «La Concordia» d’Ôrvaye, è sté trovu Philippe CHAMBERLAND, l’ ôteûr du Marenne (Hotton) pou lî fé mète al sin.ne sa pîce an 3 akes «Lu Miraculé» c’ astot sa prumîre pîce, sucrîte an 1993 ; i ‘nn-è ruscrît ène öte deûs ans pus tôrd, èt avo promètu ène trwâjime ô mwêsse PIRSON, mês on la ratind co… Lu cé ki ratind n’ è nin hôsse coume on dit avô ci.
Lès Gômès on rtrovu ossi in scrîjeû d’ pîce avu Christian LAMBINET, k’ è scrît pou la troupe du l’ Atelier des patois gaumais, «Lès utils intèrloyis ». Alaboneûre a nös ôteûrs! Èt boune continuâcion a tourtou(te)s!
© Pierre Otjacques, revue Singuliers 1-2018