Lès Souvnances

Èstant èfants, bin vite, on rmarke,
On wête, on choûte… Èt ç’ ku dj’ fèjant,
Nosse vîe è va pwarter la marke,
Èt nos ruvnu o cours des ans.
Nosse cèrvê rsan.ne fwart a in vâse
Ki, po pus tôrd, su va rimpli,
C’ èst a-z-î mète, tant k’ i gn-è place,
Kèke tchônse du bê èt d’ bon ossi

Cand dju rpassans totes nôns souvnances,
Lès bones vènèt d’ cand dj’ djouwins co.
Nôns ptits tracas, nôns impaciances,
La nayivté d’ rusponse a tot.
C’ èst ôs prèmîres du nôns anées
Ku dju rsondjans ça v’cî, soye t-on,
Come si noste âme dmeûr’rot frapée
Dès bês momints ardants d’ adon

On s’ ruvèt la, apèrdant djon.ne,
Dmandant sins cèsse: cwè-ç’ ci? Cwè-ç’ ça?
Comint fwêt-on? Èstant a pon.ne
S’ on nos lèyot dins l’ ambaras.
Ç’ k’ astot dvant nos, sins conuchance,
Dj’ nos l’ èsplikins a fotche, a neûd,
Sins trop z-î mète du l’ importance,
Mês imitè, ç’ alot tot seû

Du bin mostrè, gn-è grand mèrite,
C’ èst in deuvwar a n’ nin mankè,
La ké ritchèsse, si on sème vite
La bone grin.ne ki fructifiêrè,
Dlé lès vîyes djins, mî adlé mwintes,
Dj’ avins ruscousse po savèr tot.
Cand i nos djint leûs fwaces duschinde,
I vèyint kî lès ramplaçrot

A cwè srot-ç’ bon dès préyambules
Po fè comprinde dès ptites kèstions?
L’ èfant nu s’ prind nin ôs formules,
C’ èst dès-ègzampes k’ i tire rêzon.
Dins la nature û tot l’ antoure,
Vos vèyez s’ keûr su rèdjouwi.
Sûrmint d’ conuche k’ i mèt d’ l’ amour.
L’ bon Dieu è fwêt brâmint por li

A l’ bone campagne, an plin.ne nature,
Çu k’ èn-èfant put ètudiè!
Du tot ç’ k’ i sondje èt qu’ i s’ figure
Gn-è mile ègzampes po l’ ocupè.
I put s’ mète duvant ène arègne,
La vèy fiyè su fin ridô,
Ôs mouches d’ api, la, k’ i s’ ransègne,
S’ leûs magnifikes èt bons gatôs

Ostant k’ i put vèy dès capiches,
Olines, baloûches èt tant d’ pampions!
A l’ êwe, la trûte file èt ramiche
Po s’ noûri d’ vièrs piardus ôs djons.
Dissus lès-ôbes, l’ oujê ki tchante,
Sès ravichantes èt guêyes coplèts,
Ku l’ solê lûche, k’ i plûche, k’ i vante,
Tot-èst mèrvèyes, tot-est succès

I du ôs plantes pus d’ on cômp d’ ouy,
Dins lès cortis èt dins lès tchamps,
Cand su l’ wazon, i s’ cuvèroûye,
C’ è-st-in tapis su ranouvlant ;
Tint k’ a costè, lès grins, l’s-avon.nes,
Montèt leus pômes su leûs fustus
Et ku l’ solê douçmint l’s-amôn.ne
A tchandjè leûs-ônrs an vèrtu

C’ èst dès souvnîrs du sa djon.nèsse,
Cand l’ èsprit s’ drûve èt s’ vut rimpli.
S’ il è po mêsse, dès djins d’ adrèsse,
L’ èfant, po sa vîe, srè apris
Èt cand i wête bin hônt lès stoyes
Lurkè dol nut’, i s’ assur’rè
Ku l’ Ête suprême, i fôt k’ i croye,
K’ sins sa pwissance rin n’ su put fè.

© Pîre Djônsèf Dosimont en wallon d’Arville, manuscrit inédit, avril 1930,
héritiers et revue Singuliers

Malêjis mots
arègne = araignée / avon.ne = avoine / baloûche = hanneton
capiche = fourmi / cuvèroûyè = vautrer 
drûvi = ouvrir. / fotche = fourche
fraper = produire une vive impression, frapper l’imagination
grin = céréale, froment / lûchè = luire
urkè = briller / mouche d’ api = abeille
oline = chenille / oujê = oiseau / pampion = papillon
ramichè = remuer / stoye = étoile
trûte = truite / wêtè = regarder.