Al cache

Rotè,
On m’ l’a tant vèyu fè!
Ayi, tofêr rotè,
Mins dji n’ sé nin poqwè...

Rotè
Qu’i faîye bia
Oudôbin frèd,
– Èt nin todi tot drwèt –
Po-z-alè veûy vélà
À mitan rin!
On tchamp, on bwès,
One môye di strin?

Dj’a sayi d’ gangni qwè
À yèsse dranè
À tant rotè?

Rotè,
Au pus sovint mièrseû
Al cache après…
Mi?
Twè?
Ou nos-ôtes deûs?

Rotè
Avou totès-istwêres è m’ tièsse,
Èt vikè longtimps
Po co rotè,
Èt fè qui chaque dimwin
Seûye on novia djoû d’ fièsse!

© Georges Puissant, Rèlîs Namurwès, revue Les Cahiers wallons 2-2021, li P’tit Guèc,

Wallon central, parler de Anhée - An.yéye