© 2015, Josse Goffin, Regard à gauche

Pârin a s' djoûrnéye

Benoît Deschamps

Texte

Audjoûrdu, c'èst sèmedi. C'è-st-on grand djoû, pace qui pârin a s' lèyî-passer po l' djoûrnéye. Vos compurdoz bin qu'on n' pout nin lèyî lès djins cobèrôler insi al diguèdaye come il ont l'idéye.
Ça faît d'djà one sinte apéye, è 2022 si dji m' sovin bin, qui nos minisses ont dècidé qui, quand ç' n'èst nin po-z-aler bouter, on n' pout rèche foû di s' maujone qu'on djoû tos lès mwès.
Èt pârin, li, ça fieut chîs mwès qui s' djoû n'aveut pus tchèyu on sèmedi ou on dîmègne. D’abôrd impossibe di s'aler pormwinrner avou Maurtin, si p'tit-fi, qu’èst tos lès djoûs, do londi au vinrdi, pad'vant s'-t-ôrdinateûr à choûter l' maîsse di scole. Maurtin a yeû sès yût-ans i-gn-a quinze djoûs, li 23 d’ julèt´.

Ça fieut longtimps qu' pârin aveut l' dâr d'aler veûy li muséye do rèstaurant èt do cabarèt avou Maurtin. I n'a nin balziné. Il ont pris l' trin al gâre di Mautche-lès-Dames èt d'chinde à Nameur. Su l' quaî, on-ajent d' police èsteut à l'awaîte. Mins i n'a nin d'mandé l' lèyî-passer da pârin. Maurtin èsteut tot èfoufî. Pârin èto, d'alieûr.

I-gn-aveut fwârt longtimps qu'i n'aveut pus milouté one miète si p'tit-fi.
À grandès-ascauchîyes, i dèboulenut su l’ Place do Vî Martchi. Gn-a nin on tchin. Maurtin d'mande :

— Dijoz, Pârin, c'èst qwè tos cès vîs botiques-là ? Douvint qu'i sont tortos sèrés ?
— Ça, Maurtin, rèspond-t-i pârin tot somadjant, ci n'èst nin dès botiques, c'èst dès cabarèts èt dès rèstaurants.
— Dès cabarèts èt dès rèstaurants ? I m' chone qui l' maîsse nos-a causé d' ça, mins dj'a rovî ç' qui c'èsteut.
— Dins l' timps, c'èsteut dès places èwou-ç' qui lès djins alin.n´ po bwâre èt po mougnî.
— Quéne drole d'idéye !
— Taurdjoz one miète. Vos-aloz comprinde.


Il arivenut pad'vant l' muséye. Dins l' vî timps, c'èsteut on cabarèt qu'on lomeut "Li Ratin tot". Il a stî sèré è 2020. Èt vint-ans pus taurd, il a div'nu on muséye. Pârin achetéye deûs tikèts, i paye avou s' tèlèfone di potche.

— Bondjoû, Mossieû, bondjoû m' Fi, di-st-èle li d'mwèsèle do muséye. Avoz vos tikèts, vosse lèyî-passer èt vos passepôrts di vacsinadje ?
Pârin ramoncèle tos sès papîs. I n' trove nin s' lèyî-passer ! L'aureut-i rovî al siponde di s' lét ? Oubin su l' tâblète dèl finièsse dèl cûjène ? Qué rovis´! Â, non.na, vo-l'-là ! Quéne chance ! Pont d' lèyî-passer, pont d' muséye, on n' pout nin bate conte ça !
— Mèrci, vos p’loz bin moussî, di-st-èle li d'mwèsèle.


Asteûre, i sont dins one grande place avou brâmint dès p'titès tauves. Gn-a dès tauves avou deûs places, èt d's-ôtes avou quate places. Maurtin d'mande :
— Mins douvint qu' lès djins v'nin.n´ véci acheter à bwâre èt à mougnî ? C'èst bin pus aujîy di fé one comande su djimgafîye@nameur èt d' ratinde li vwèture-sins-mwinrneû qui v's-apwate tot à vosse maujone ?
— C'èsteut po l' plaîji di s' raploûre tortos èchone, èsplique-t-i pârin.
— Adon, lès djins mougnin.n´ tortotes èchone ? Rètassîyes come dès sârdines dins leû bwèsse ?
— Mins douvint qu'i purdin.n´ dès risses insi ? Èt comint èst-ç' qu'i fyin.n´ po mougnî avou leû masse ?
— Di ç' timps-là, on n'aveut nin co l’abitude di ça !
— Â ! Mins d'abôrd, lès-ospitaus èstin.n´ bôguîs d' malades ?
— Non.na, m' fi, quand dj'èsteu djon.ne, lès-ospitaus èstin.n´ quausu vûdes èt lès rèstaurants èstin.n´ bôguîs d' djins qui fyin.n´ glèter leû minton à n' s'è nin fé one idéye !
— Pârin, dji mougnereu voltî one lètcherîye, mi, asteûre !
— Â ça, i vos faurè ratinde di yèsse rintré al maujone. Gn-a dès crinmes à la glace o conjèlateûr !





© Benoît Deschamps, Rèlîs Namurwès, revue Les Cahiers wallons 2-2021

Scole dès Rèlîs namurwès, apurdice di deûzyinme anéye. Dame di scole Joëlle Spierkel

Wallon central

Notes
Al diguèdaye: à l’aventure
Place do Vî Martchi: Place Marché aux légumes
Ratin-tot: ainsi ortohraphié
al siponde: au côté accessible du lit.



 

Metadata

Auteurs
Benoît Deschamps
Sujet
Habitudes d’avant confinement en désuétude dans le futur.
Genre
Récit
Langue
Wallon central
Relation
Revue Les Cahiers wallons 2-2021, Rèlîs Namurwès
Droits
© Benoît Deschamps, Rèlîs Namurwès, revue Les Cahiers wallons 2-2021