Li crèkion

      Li solia s’a coûtchî, bén taurd, come po fé dîre,
      Dimwin, i s’ lève matén. Faut qu’i done. C’èst l’èsté!
      L’êr brûle co ; lès mouchons n’ont pus l’ fwace di moufeter ;
      Gn-a nén one fouye qui boudje dissu l’ campagne ètîre.

5    Èt là qu’ dèl têre mafléye i s’èlève one tchanson…
      One tchanson? C’èst branmint! One saqwè qui tchîpèle,
      On tot p’tit brût qui frîle èt tot d’on côp infèle
      Jusqu’à rimpli l’ vièspréye. Ci brût-là, c’èst l’ crèkion!

      On crèkion!... Quand on l’ wête, ci n’èst qu’one crawieûse bièsse;
10  On dîréve qu’èle èst fête avou dès bokèts d’ fiêr,
      Ou putôt, deûs fouyas tot nwâris pa l’uviêr,
      Qu’on âréve aclapé dissu saquants-èrièsses.

      I s’ pout qu’on djoû, l’ bon Diè, odé d’ fé dès pawions,
      Èt d’ dorer tant dès-éles, – an djouwant, po s’ distrêre,
15  Avou saquants ramechis´ – lès-a tapé su l’ têre
      Èt, an lès vèyant r’djiper, a dit : C’èst twè, crèkion?

      Dji n’ t’a nin fêt èsprès ! Ti n’as qu’ dès burtons d’éles,
      Mins lès pates fêtes à r’ssôrt ? Pôve crèkion, vole si t’ pous!
      Dji n’ t’a pont d’né d’ gozî ni pont d’ bètch : tchante si t’ vous!
20  Mèfîye-twè dès-èfants, wête al faus, wête al céle!

      Li bièsse tchèyeuwe do ciél didins on vèt´ pachi,
      Comince à djiboter, saye sès-éles inutiles,
      Èle a bau s’èfwarcî ; lès-éles ranchenut, subtiles,
      Èle n’èvole nén… mins là qu’on ètind come on cri…

25  Èt sins-è d’mander d’ pus, li p’tite bièsse ricon’chante,
      Tote contin.ne di viker, sôle di seûve èt d’ solia,
      Li p’tite bièsse sins gozî, aus pates di fi d’ârca,
      Avou sès rwèdès-éles a fêt s’ murauke : èle tchante!

      C’èst bin là nosse planète, èn’don, tchanteûs walons?
30  Nos n’avans wêre di bètch ; on-z-a rondjî nos-éles,
      Èt traqués pa dès linwes pus mèchantes qui dès céles,
      Nos r’djipans, pôvriteûs, come nos fréres lès crèkions.

      Mins rén qu’an fiant frumejî nos pôvès-éles rondjîyes,
      Nos p’lans, come zèls, rimpli lès campagnes èt l’èsté,
35  D’one tchanson qui tot l’ monde è-st-oblidjî d’ choûter
      Èt qui tchante li bouneûr èt totes lès djôyes dèl vîye!

      Lès vèt´ pachis floris trin.nant leûs rôbes di v’loûrs
      Jusqu’au bôrd dès richots, lès bwès stofants, l’eûwe clére…
      Nos fians come li crèkion, qui, contint dins s’ mizére,
40  Tchante lès seûves èt l’èsté, li solia, sès-amoûrs

      Jusqu’à ç’ qu’i moûre…

© Gabrielle Bernard, revue Les Cahiers wallons n° 4-2022, Namèche-Andenne, Belgique

en wallon de Moustier sur Sambre