Lès boles di savon

      Achîte dissu si p’tite tchèyêre,
      Marîye, ossi sâje qu’on bèdot,
      Trimpe grâvemint one noûve pupe di têre
      Dins l’ bassén qu’èle tint su sès gngnos.
5    Èt, à piède alin.ne, èle sofèle,
      Dès boles di savon qui montenut
      Come on bia bouquèt di stincèles
      Bén ôt dins l’êr, èt s’î pièdenut.

      Tot d’on côp, èle mi dit : C’èst drole,
10   Dj’ènn’a tant fêt, èt n’è d’meûre pont;
       Dji n’ vou nén qui ç’tèlcile èvole,
       Vos-alez vôy quén gros balon!
       Èt volà l’ grosse bole qui gonfèle,
       Lès meurs, lès aubes î r’glatichenut;
15   On crwèréve, télemint qu’èle èst bèle,
       Qui l’ârc-an-ciél a fondu d’ssu.

       Wêtîz one miète, di-st-èle Marîye,
       Tot ç’ qu’on pout vôy dins ç’ balon-ci!
       Dji wè l’ maujone tote riplèyîye
20   Èt, tot cotwardu, l’ cèrénjî.
       Mins quand l’ balon skète èt l’ ramouye,
       Pa t’t-avau s’ vizadje èt sès tch’vias,
       Marîye somadje, lès lârmes aus-ouy,
       Dj’ènn’avéve co pont fêt d’ si bia!

25  Èt dji di : Vos f’roz bén, dins l’ vîye,
      Dès balons bleuw, rôses èt dorés,
      Qui vos lêront tote disbautchîye,
      Quand i skèteront pa-d’zos vosse nez!
      Èt dès bèlès boles, bén sofléyes,
30  Qui vosse keûr èt vos-ouy sûront
     Quand èle monteront dins lès nûléyes,
     Èt qui jamês ni r’dischinderont!

      Poqwè d’mèrer tote ramakéye?
      Rassûrez-vos, gn-a rén d’ pièrdu!
35  I d’meûre mwints boles dins vosse savenéye,
      Èt vos-ôtes sondjes sont cor à v’nu!
      Qu’avîz compris, don ? N’ faut nin brêre,
      Lès sondjes, i-gn-a co rén d’ mèyeû!
      — Marîye, donez-m’ vosse pupe di têre,
40  Lèyîz-m’ sofler one bole ou deûs…

© Gabrielle Bernard, revue Les Cahiers wallons n° 4-2022, Namèche-Andenne, Belgique

en wallon de Moustier sur Sambre