Mârîye, èl Flamindje

(walon d’ Mont’gnî - Montigny-le-Tilleul)

Èle a stî al’véye o baston. Ès´ moman n’asteut nin àl donéye. Lès doudoûces, èç Flamindje la n’ lès conch’neut nin. Èle n’aveut pont d’ tins a brichôdér pour wastér sès-èfants. Èl tins, c’est dès liârds èt dès liârds, i dè fôt tous lès djoûs pou noûri l’pèkéye !
Ça fét què Mârîye n’a jamés yeû l’crédit dè djouwér a l’èfant. Toute djon.ne al bèsogne su l’ damâdje, èle n’a nin yeû l’ tins dè dalér a scole. Avè l’s-anéyes, lès gamines, ça d’vint co râde dès feumes èt Mârîye come toutes èls-ôtes a yeû dèdins s’ tièsse dès pinséyes parèyes a dès rèves : gangnî s’ crousse, awè s’ pètit mwin.nâdje, èyèt p’t-ète bin al’ vér dès-èfants !
Dins l’ ralâdje plin dèl fosse, i-gn-a dès r’gârds qu’i s’pièd’neut èyèt d’s-ôtes qui s’ trouv’neut èt s’èmacrâl’neut. Lès bleûs-îs du djon.ne Dofe ont crwèsè lès rèves da Mârîye.

Ô, ça n’a nin stî tout seû! I lyî a falu l’adoûcinér, lyî fé comprinde qu’a deûs, on-èst toudis pus fôrt, èyèt qu’i s’reut vol’tî l’ome qui l’ tinreut pal mwin, pou chûre avè lèy ène voye qui s’reut d’asârd dè dos a kèdje.

Dofe, li, aveut yeû dèl chance. Bin sogni, ène mîyète wastè minme, il-aveut stî a scole toudis assèz què pou sawè lîre, scrîre èyèt contér. Dofe, ç’asteut in p’tit courâdjeûs qu’aveut l’idéye, pouqwè nin, dè d’vènu mésse porion come ès´ pa.
Mârîye, mésse feume dins lès poûssiêres dè tchèrbon, mésse feume dins s’ mwin.nâdje, èskeûjeut vol’tî lès brouches, lès sayas èyèt l’ nwêr savon.
Intrè buwéyes, bidons èyèt cûjâdjes, èle a mètu ô monde lès-èfants qu’èle d’aveut yeû l’èspwêr : trwès bèlès fîyes a rôsès brâyes mins, Bon Dieu d’ bos, trwès gros gamins, djusse bons pou dès fayès linçous !

Du courâdje, èle d’a yeû ostant qu’i lyî d’a falu pou rapôjî s’ keûr, pou sognî èt alvér trwès p’titès feumes qu’ont râde compris qu’avè « Moman » i faleut routér drwèt, choûtér èt donér d’ l’aspoye. Mârîye wèyeut vol’tî sès fîyes mins èle nè con’cheut nin lès mots qui pârl’neut d’ tindrèsse èyèt sès mwins n’avin´ nin aprîs lès djèsses qui font du bin. Sès mwins brogn’téyes nè savin´ què s’ donér dèl pwène.

T’t-ossi vayant, Dofe, li, gagneut l’ pwin dèl pètite famîye, sogneut sès pârtchès, al’veut dès lapins èt dès poûyes. Ça l’ candjeut dèl fosse du Pèchon qu’i wèyeut toûrnér lès moulètes dèspûs l’ dèbout dè s’ djârdin. Intrè deûs pôses, avè ostant d’ doûceû què d’ pacyince, i pèrdeut sogne dè Mârîye, lyî apèrdant a lîre èy’ a fé dès calculs.
A deûs, is-ont-st-insi tèchi, djoû après djoû, leû-n-amoûr dè p’titès djins, in-amoûr brâve môgré lès pwènes èt lès arnôjes, in-amoûr brâve djusqu’al dérène tousse dè l’ouyeû èvoye bin trop timpe.

Mârîye, èl Flamindje, què t’t-ô dèlong dè s’ vîye s’a luvè avè l’ tchant du coq èt s’a coûtchi avè l’ djoû. Mârîye, mére seûle, a fini pa piède èl tièsse, pa s’èdalér, ène nîut d’ivîer, ô diâbe bin lon al cache dè yeune dè sès fîyes.
Mârîye, dure dèl crousse mins ô pèrfond d’ lèye minme tinre come in moûdri pwin d’ mîye.
Mârîye, èl Flamindje, èm grand mére, qui n’a jamés su scrîre ès´ no !

© Danielle Trempont, 2017