© 2015, Josse Goffin, Regard à gauche

Estans dj’ tertos Tchårlî ?

Lucyin Mahin
Joëlle Spirkel
 Djozewal

Texte

Li 5 di djanvî, deus Francès etrinnés å Yemen pa des mouvmints islamiveus, atacnut li gazete po fé rire « Charlie-hebdo » (Tchårlî-samwinne) k’ a s’ sidje a Paris, et macsåder cåzu tos les gaztîs et manaedjeus. I sont porshuvous pa totes les polices di France, pu dischindous.

Divant di touwer les Tchårliyîs, il ont dit on messaedje ki leye adviner li pocwè d' leu fwaitindje. I volént rvindjî li profete Mawoumet. Kimint, çoula ?

- Li prumire afwaire des caricateures

Nos estans e 2005, a Copenake, Daenmåtche. Ene gazete daenwesse, li Jyllands-Posten (Posses do Djutlande), si mete el tiesse di fé si yene so l’ islam. Et dessiner li profete Mawoumet ene dijhinne di côps. Rén d’ bén metchant. Minme ki shijh di ces caricateures la seront rprinjhes, pa ene gazete do Caire, Al Fagr (les Aireurs) li 17 d’ octôbe, e plin cwareme muzulman. Sins må sins rujhe : ni les rlidjeus d El Azar, ni l’ govienmint da Moubarek ni s’ ritoûne di çoula.
Tot do contråve, les muzulmans daenwès, zels, sont dismontés disconte do Djutlande-posse. Aprume ki des ôtes gazetes foû-payis, inte di zeles li francès Tchårlî-samwinne, riprindèt les desséns.

Nos fåt comprinde ki – årvier des crustins, mins sifwaitmint k’ les djwifs –, les moslimîs ni rprezintnut måy li Bon Diu ni les profetes so des imådjes rilidjeuses. Les rålès foû-rîles [rares exceptions] vegnnut d’ après l’ Iran et l’ Irak, do tins des rwès mongols, dins des enimådjaedjes [enluminures] di lives rilidjeus. Mins, après côp, on-z a disfacé les traits do vizaedje do mwaisse persounaedje, cinsé rprezinter Mawoumet.

Les moenneus del proteståcion e Daenmåtche fourît poleymint recdûts på prumî minisse, pu rboutés dins leu ametaedje des gaztîs divant les noerès cotes. Adon, sacwants did zels alît trover les rwès et prezidints del Ligue arabe, et adon diner ene nouzome riclame al margaye. I shonne k’ i vont mostrer eto des caricateures måhonteuses, ki n’ sont nén les cenes del gazete daenwesse. Come les djins des payis muzulmans, pa respet et pa manke di documintåcion, ni loukèt nén les ametowès imådjes, i vont fé docô l’ diåle pus noer k’ i n’ est. Gn årè des bardouxhas [émeutes] avou des moirts, on boycotaedje des prodûts daenwès, et des anêyes di dimesfiyance d’ avou l’ Daenmåtche.

- On ricmince et on fwait mî


E 2014, li gazete francesse po-rire programe on limero speciå lomé « sharia-hebdo », ene kitoirdowe cogne di leu no. El fwaiynut tot cnoxhant les risses. Il ont ddja stî atakés et 2008 et leus locås målfouwés [incendiés].
Mins por zels, li liberté di s’ fote est sacrêye. I s’ voeyèt come les dierins sorvicants d’ ene dujhance di caricaturisses afrontés, ki florixheut ddja al fén des anêyes 1800 kimince des anêyes 1900. Leu-z ovraedje vént bén a pont al societé, tot mostrant les målès keures di totes sôres d’ otorités ki n’ polèt nén esse critikêyes pa leus « sudjets ». Vos avoz des modeles cial djondant.
Li drame s’ eshût.
Les djins des payis do Coûtchant sont mouwés, waloneus eto. Voci on bea et poenneus scrijhaedje da Joëlle Spierkel å leddimwin del touwreye. Ele kimince pa rahoukî deus vers da Jean Guillaume :
Mi cour est evoye al disbåtche
Dispu l' matén pa l' ouxh å lådje

- Dès côps qu'i-gn-a, gn-a pus rin qui va !

Audjoûrdu, nos-èstans pèneûs come on r'naud qu'one pouye aureut yeû !
Nos nos-avans dispièrté tot machurés èt nosse keûr è-st-ossi pèsant qu'on pwin d' chîs lîves !
Mins nos brès n' sont nin vûdes ca nos pwartans l' bèsace di Charlie !
Li cène qu'èst todi plin.ne di libèrté d' dîre, di scrîre, di lîre, di tchanter, di dèssiner
Li cène qu'èst todi plin.ne di rîre, di couyonâdes, di fiyâte po d'mwin
Mins plin.ne di risses èto èt, fwârt avant, plin.ne di vîye sins peû èt sins in.ne !
Tot rindant bon d'vwêr aus fèls dèssineûs èt aus gazètîs, aus-ajents d' police, aus brâvès djins qui sont mwârts sins-awè tot faît leû bouye
Tot sowaîtant aus cias qui sont-st-à l'ospitau di r'prinde fistu au pus rade
Nos leû d'djans : « Nos nos foutans do diâle èt co do martchand ! »

Après l' touwaedje, on va vey des nouzomes ratroplaedjes di djins a Paris (500.000), mins eto a Brussele (60.000). Il afitchèt tertos li minme eslogan « dji so Charlie ».



Metadata

Auteurs
Lucyin Mahin
Joëlle Spirkel
 Djozewal
Langue
Wallon