Frankisté, frairisté, ewalisté ?
Richard Joelants
Texte
Pol Rantoele 73, nos avéns dmandé a des djins d’ hintche çou k’ i pinsént del campagne « dji so Tchårlî ». Ritchåd Joelants aveut dit l’ sinne insi :
Vochal, Lucyin, a mi idêye, onk et l’ ôte (les « dji-so-Tchårlî » et les antis) sont-st a hiner evoye. « Liberté, fraternité, égalité » : vo lzès la, les mameles di tote l’ afwaire.
- Liberté
Chal, e nosse pitit payis, avans ns vraiymint li liberté ? Nos estans loyîs a totes sôres di pakes, di rashonnmints, d’ unions monetaires, et vos nd åroz. On candje di govienmint et ki voeyans ns ? Des ôtès djins di ds ôtes pårtis ki n’ avént nén dmandé totes ces emantcheures la mins ki sont-st oblidjeyes di fé come les ôtes. Les vôtes des djins contèt po do boure et si n’ vôtaedje n’ esteut nén obligatwere, dj’ endè cnoxhe nén toplin k’ irént co vôter. Divins noste Urope moennêye par les pus grands payis, nos dvans fé tertos come zels. Pår nozôtes, nos avans djusse li droet d’ clôre nosse betch !
- Fraternité
Dji l’ a cnoxhou dvinltins, cwand des ovrîs del minme oujhene dinént tertos on côp d’ mwin å ci ki fjheut si måjhone. Voeyoz vs co çoula asteure ? Dji n’ irè nén pus lon, ca i m’ fåreut torade ene Rantoele por mi tot seu rén k’ po vs diner des egzimpes. Pocwè çoula ? I n’ årè bénvite pus des oujhenes et les cis ki s’ lomèt camaerådes ni savèt pus çou k’ çoula voleut dire. Damaedje : i n’ a pus des houyeus.
- Egalité
Vola dedja do tins k’ elle est corowe-evoye, tant inte di nozôtes k’ avou les cis ki fjhèt des foirts longs voyaedjes po trover ene tåte a dner po leus efants. Les ritches moennèt l’ monde, tchôkèt-st e trô les ptits ki divnèt todi pus pôves. Li tere si distrût leye-minme. On bea djoû, ele si xhiyrè e cwate et vos problinmes di « esse Tchårlî ou nén », fré Lucyin, seront reglés ene feye po tote.
Dji sai bén ki cwand on dvént vî, on djinne tolmonde, minme ses efants et ki mes idêyes sont motoit foirts sitroetes. Mins po fini, et vos l’ savoz bén, cwand des plankets come vos, par egzimpe, sayèt ene sacwè po fé rviker nosse walon, des ôtes plankets sayèt do distrure çou k’ vos fjhoz.
Ci serè m’ concluzion po ouy. On est contin do divni vî.
Avou mes meyeus sintimints walons,
Richard Joelants, li 16 di fevrî 2015