Istwere di l’ Afrike

So mes nouv ans å Bouroundi

C’ est on payis eyou dj’ a dmoré 9 ans di 1971 disk’ al fén d’ 1980. Metou å coron d’ n’ onk l’ ôte, dj’ a dmoré e l’ Afrike dipus d’ 23 anêyes di 365 djoûs, di 1953 a 1984.

Dji n’ vos dvizrè nén do disdut k’ i gn a asteure. Dji n’ a pus waire di contaks avou les djins d’ avår la. Courtinnmint, dji dirè ki les moenneus des payis afrikins å djoû d’ ådjourdu, ci n’ est nén todi les pus meritants, ni les pus maléns.
Mins cåzans di çou k' dji cnoxhe bén, après awè viké dijh anêyes di ç’ costé la (èn an « so campagne » å Rwanda di 1953 disk’ e 1954 eyet nouv ans å Bouroundi di 1971 disk' e 1980.

- Bouroundi et Rwanda

I fåt sawè k’ el Bouroundi eyet l’ Rwanda, s’ vijhén, c’ est des « copies conformes » : onk rishonne a l’ ôte, tafwait come des djermales. Les djins do Rwanda sont tot pareys a les cis k’ dj’ a cnoxhou å Bouroundi : Houtu (85 %), Toutsi (14 %) eyet Twa (des ptits omes) (1 %). Les problinmes sont les minmes eto. Po comincî, li ci d’ ene mådjorité disconte ene moennorité. A ene diferince près : c’ est k’ å Rwanda, les Houtou ont rviersî les Toutsi dispoy 1959 disk’ e 1994, l’ anêye du « djenocide ». (ça a stî li « peupe-sipata » el pus moudréle ki l’ Afrike åye conoxhou e XXinme sieke : 1.000.000 d’ moirts do moes d’ avri å moes d’ djun).

Termetant k’ å Bouroundi, les Toutsi ont stî les mwaisses disk’ aviè 2000.

- Demografeye

Li democraceye, c’ est onk des problinmes do payis, mins end a ds ôtes. Bråmint sont raloyîs a l’ « esplôzaedje demografike » : 1.900.000 djins e 1952, 7.500.000 e 2000. Si dji conte bén, ça fwait cwate côps ostant. Do côp, tolmonde vout ndaler a scole pusk’ i gn a pupont d’ tchamps assez po fé poûssî tot çk’ i fåt po mindjî. On a fwait des escoles a make... po fé des « tchômeus » al fén do conte.

- Sida

Ey asteure, i gn a l’ sida ! Avou totes ses consecwinces. Rapoirt a ça, on est scran d’ è cåzer, paski pattavå e-n Afrike, c’ est l’ minme.

I gn a pont d’ ermédes, mågré les pretchaedjes des djins bén pinsants. Infén, disk’ å moumint k’ les omes did par la ès såront ertini, ou s’ espaitchî d’ foirci les comeres. Eyet, ça n’ est nén co po dmwin. Dji n’ vos va nén fé on dessén !

Eyet ç’ n’ est nén totes les biestreyes k’ on nos pout låtchî ladsu ki vénront candji ene pitite sacwè ! Minme les avis des «dji-sai-tot» des S.N.R. [Soces nén Recwårlantes, O.N.G.] ki pretchnut todi po leus tchapeles e bribant dlé nos. I sont la avou leus cwate-cwate climatijheyes. (sins ç’ plaijhi la, i n’ s’ irént nén eskinter po fé l’ bouneur des djins d’ par la).

Mins les djins, zeles, ni sont nén todi d’ acoird di shuve les voyes k’ on lzî propôze po n’ nén haper l’ maladeye.

- Istwere del peuplåcion

Po comincî, la pus d’ meye ans, tot l’ payis steut covrou pa ene foirt espesse foistreye [foresterie = forêt]. Les prumîs omes k’ î dmorént, c’ ît des ptits omes, les Twa, ki viként del tchesse eyet do codaedje des fruts et des raecenes. Pask’ i n’ avént nén l’ idêye ni les ostis po dirôder eyet coûtiver.

Adon-pwis, cwand l’ dezert do Sara s’ a stindou e tchessant les « Bantous coûtiveus » k’ î stént, il ont dvou ndaler vir ôte pårt po trover des plaeces po fé des tchamps. I nd a k’ ont-st arivé insi so les tienes do Rwanda et s’ mete a dirôder tot leu pus foirt sins s’ ocuper des Twa k’ ont stî må pris ey i nd a waire k’ ont sorviké.

Après les Bantous - roci lomés Houtou – des djins d’ Etiopeye ont stî oblidjîs d’ baguer avou leus vatches, tchessîs yeusses eto pa l’ avance do dezert. Eyet, i gn a aviè meye ans did ci, sacwants d’ ces djins la, e passant pa l’ Ouganda, s’ ont aresté el long d’ l’ Acaguera (eyou k’ c’ est asteure el Park di l’ Acaguera). Gn a des ôtes k’ ont co stî ene miete pus lon, divant d’ arester a l’ Ouwess di l’ Ouroundi, el payis vijhén. Ces djins la, c’ est les Toutsi, des bierdjîs-vatchîs.

Les Houtou ont tant et si bén dirôdé k’ i gn a ostant dire pupont d’ bwès do tot. A leu-n arivêye, les Toutsi n’ ont pont fwait d’ brut ey il ont dmoré l’ long d’ l’ Acaguera disk’ å Bouguessera, eyou i gn a pont d’ bounès teres po coûtiver. Do côp, ça n’ djinnéve nén les Houtou. Mais les Toutsi ont radmint veu k’ les Houtou n’ s’ etindént nén eshonne : i gn aveut on moncea d’ pitits rweyåmes ki s’ djalozént onk l’ ôte eyet todi e trén di s’ bate. Ene miete come el leu ki s’ aveut abiyî avou ene pea d’ berbis, les Toutsi avént adopté l’ lingaedje (kiniarwanda) eyet l’ vicaedje des Houtou. I n’ ont pont yeu d’ må po s’ arindjî e dvinant ptit-z a ptit les mwaisses po k’ i gn euxhe pupont d’ djalots.

- Discolnijhaedje

On cåzéve dedja d’ democraceye après l’ guere dè catoize. Mins djusse e l’ Urope ey e l’ Amerike. Après l’ guere di 40, ça a divnou l’ môde tocosté. Po fé plaijhi a l’ ONU, les Bedjes ont dvou mete fén å sistinme feyodå des « Territoires sous Tutelle du Ruanda-Urundi »

(a shuve)

André Chauvaux, papî eplaidî aprume dins l’ gazete des Foyans d’ Cerfontinne