Çou k’ est houte est houte
Ziré Malet
Texte
Ratacaedje
Nos n’ serans pus djamåy ni djonnes ni beas. Mins nozôtes, les pus vîs, nos avans totes nos åjhes po esse ureus et co plaijhants et minme po pårti do bouneûr åtoû d’ nos…
Li pus djoleye des comeres, si ele mostere ene laide maye mårivnante, li pus vayant des galants si distoûnrè abeye di leye.
Cåzez m’ purade d’ on bénrivnant vizaedje tot pleuti avou des ouys come des stoeles et on bea grand sorire disk’ ås orayes. Vola do bouneur ki rglatit, del djoye dins vosse keur po on moumint.
Ci sorire la, il est a l’ poirtêye di tertos, minme do pus minåve: s’ i sorît, et k’ il a dandjî d’ vos, vos seroz åjheymint pus decidé a lyi fé plaijhi, a lyi dner on côp d’ mwin, d’ el voltî aspaler dins ses ouves.
A noste ådje, on n’ dåre pus d’ on ran sins tourner dins s’ tiesse les pondants et les djondants; divant do dner li boune response a çou ki s’ prezinte, po discomeler li pus målåjheye des rascråwes, po dire les mots ki rapåjhnut.
Ci n’ est nen trisse di divni vî : i nos fåt tchoezi li manire do viker po çou ki dmeure di nosse vicåreye.
Ziré Malet, li 29 di måss 2017