Eternåcionå

Deus moes d’ cérudjeye a Mossoul

Nén totafwaitmint. Ene cwénzinne di djoûs divant l’ terme, on hôt boss des M.S.F. (Medcéns Sins Frontire) nos vna copler sacwants djoûs, et nos trover fornåjhis. Et ahoukî ene novele ekipe po nos replaecî.
Fåt dire k’ on a tnou on rite ki l’ Diåle lu-minme n’ åreut nén vlou prinde. Cwate cints operåcions po nozôtes cwate cérudjins. Deus espatriyîs et deus Irakîs, mins k’ estént purade des mwaisses aidants ki des vraiys frés d’ mestî.
Mins rivnans ås pondants et djondants di noste evoyaedje rola.

Li batreye di Mossoul

Elle a stî enondêye li 15 di djanvî 2017. I s’ adjixh di rprinde a Dayech li mitan coûtchantrece del veye. Les forbots po cmincî, çou k’ a stî fwait a l’ eure d’ ådjourdu. Adon-pwis, li viye veye, lomêye droldimint Mossoul El-Djadida (Nouve veye).

L’ anêye passêye, les tropes irakyinnes ey amerikinnes avént ddja rprins li boket metou å Levant do Tigue, li mouze ki côpe li veye e deus. Les Pechmergas, les sôdårs do Kourdistan otonome, avént cmincî a-z ataker di l’ ôte des costés.

Dj’ a yeu l’ ocåzion di viziter ene pitite veye crustinne dilivrêye pa les Croudes [Kurdes], El Amadiya. Totafwait î est remolou. N’ a pus deus meurs ki tegnnut eshonne. Les Dayech n’ ont nén stî a scole mon les caytresses [dentelières].

Todi est i ki les MSF ont decidé d’ aspaler les siervices irakyins, ca on saveut bén k’ i gn åreut des coixhîs po fé.
Nos avans astalé on camp 15 kilometes dizo Mossoul, la k’ gn a l’ prumî pont sol Tigue del voye k’ erva so Ticrite, pu so Bagdete.

Des toeteas tot do long do meur di clôzeure, et nosse camion-ospitå å mitan do djeu d’ beyes.

Kés cas ?

Dj’ a mostré ayir, a on prezintaedje po des frés d’ mestîs, des fotos des cas k’ on-z a yeu sol biyård. Minme des cenes et cis adûs a vir des moudreyès tchås di djostêyès djins, end ont yeu des frumjhons. Des bresses distchårnés disk’ a l’ oxhea. Des djambes a côper evoye dizo li djno. Sins djåzer des sclats d’ bombe et des bales dins l’ vinte et dins l’ schene.
Kî çk’ a tiré ou bombårdé ? Les deus costés, bén seur. Cwand t’ atakes avou des areyoplanes, ti n’ dimandes nén azès bombes di loukî s’ i gn a des civils dins l’ cotoû divant d’ esplôzer.

Pu, gn a les milices chiyites ki n’ poirtèt nén les djins d’ Mossoul (sunites) dins leu cour. Zels nerén ni dvèt nén esse eschlintchirs [pas vite gênés] po saetchî so åk ki bodje.

Ass yeu des froxhîs vinant des Dayech… ?

... ki vos mi dmandez. Deus. Li prumî n’ aveut k’ ene grosse plåye. I s’ a rade rifwait ey a stî rmetou al police irakyinne.

Li deujhinme a morou dins les mwins des infirmîs. Alez sawè s’ i n’ l’ î ont nén aidî. Li haeyime inte kiminåltés est télmint foite, asteure, e l’ Irak, ki vos vs dimandez si les sognants ont måy oyou djåzé do siermint d’ Ipocrate.
A on confré croude rescontré a Erbîl, dji dmanda çou k’ i freut avou des pacyins sunites.
« Dj’ els evoye dins l’ wastene do Tharthar », mi responda-t i, et dji n’ a pont veyou d’ clignete dins ses ouys cwand il è djha ene sifwaite.

Li pus disbåtchant...

... c’ est ki tchessî les Dayech foû d’ Mossoul ni va nén apoirter grand tchoi come rexhowe po les rujhes des Irakyins. Les Croudes s’ î rtrovront båbe a båbe avou les Chiyites, et totes les djins do payis, ki tnént purade po Saddam Hossin dinltins, ey après po Dayech.



© Martial Ledecq riçuvant Lucyon Mahin a Glaireuse, li 26.05.2017