Ene pitite bressene tins del minêye

[Walonreye / Economeye]

Moes d’ måss 2021, ene pitite bressene, lomêye « Brasserie de l’Orne» a Mont-Sint-Wibert, si dispiete dins on novea monde, li ci do cron virûsse.

Li bressene ki n’ vind k’ ene tote pitite produccion di 75 batchs di bire å moes n’ est nén trop anoyeye på seraedje des cåbarets et restorants. Ele ni djowe nén co dins ç’ coû la. Ele vind l’ mitan di s’ produccion a ses coperateus et l’ ôte mitan ås fiesses di viyaedje, di scole, dicåces ey a des ôtes bacachniks.

Prumire atake del biesse

Oyi, nos plans continouwer a produre mins est çki c’ est avizant d’ aler bouter a deus po bressî l’ bire. Nozôtes, ene bressene coperative k’ aveut l’ uzance di fé vni les coperateus nos aidî po fé l’ bire et l’ mete e botaye. K’ alans ns divni? Les deux prumirès samwinnes, li bresseu est malåde, come tote si famile. Ça rshonne å cron virûsse mins kécfeye ki ça n’ est djusse k’ ene biesse piyintche [épidémie bénigne] ramoennêye del creche do påpåd. Mins ça n’ est rén, les fermintoes sont plins, li bire travaye, on pout dmorer å rcoe et ratinde ki ça passe.

Nos decidans di s’ mete a vinde dins les botikes do viyaedje ki n’ ont nén dvou serer l’ ouxh.
Vola arivé l’ moumint d’ mete li bire e botaye. K’ alans ns fé? Bouter a deus, c’ est bén trop dandjreus. On n’ conoxhe co rén di ç’ plôke la, et tertos sont dins leus ptits solés.
C’ est decidé, vo nos la-st evoyes a deus po 18 eures di metaedje e botaye. Li prumî bresseu rneteye li couve les buzes et l’ ebotayeuse al mwin (ås shijh betchs come pol vén). Il atake li djudi a 9 eures al nute – divant, i s’ faléve ocuper do påpåd, al måjhon.
A meynute i rintere a s’ måjhone, va doirmi et s’ dipierter a 5 eures å matén. I fåt co dispufkiner tos les éndjins et buzes et maxhî l’ souke al bire. A 8 eures, li deujhinme bresseu arive et s’ mete a l’ ovraedje: rimpli et capsuler 2600 botayes, disca 6 eures al nute. Tote mierseule, ene djin !
Li prumî bresseu rprind et rnetyî et rindjî tos les bidons divant di rintrer aviè meynute. Ké dalaedje po ene cintinne di batchs di bire. Nos nel roveyrans djamåy !

Novelès eguegnes novele bire

Ça n’ s’ a nén aresté la.

L’ Univiersité do Noû Lovin ki nos ahessive les yesses [levures] est serêye. Pus possibe d’ awè les leyes [levures] especiåles po nosse bire, l’ Ôrnwesse. Cwè fé?
Nos tuzans, et ratuzer et racatuzer. Oufti ! Ene pîce po mete e trô ! I ns vént ene clapante idêye. Et si nos edvintrîz ene novele bire.
Avou les minmès dinrêyes et houbions mins avou des ôtes djets [levures]? Nos frans ene Saizon, bressêye li 16 d’ avri et k’ on lomrè l’ 16ORNE. Bresseye sins fé d’ saye divant ! Et portant, cisse novele ricete la fourit on succès et divna l’ bire do disrecloymint 2020.
Li minêye n’ årè nén touwé nosse bressene.

Ene loukeye di solea

A pårti do moes d’ may 2020, on s’ a rabaiti ki ça n’ esteut nén si dandjreus k’ ça di bouter a deus ou minme troes, si on prindeut bén asteme di n' si nén ratchofter a l’ arivêye et poirter des masses. Et rpriyî les coperateus a nos vni dner on côp di spale.
C’ est adon ki nos avans ragrandi l’ bressene tot ratchtant on deujhinme fermintoe. Ça fwait: on a bén vindou di tot l’ esté.
Houte di çoula, nos avans enondé nosse botike so les fis [vente en ligne]

Tot conté et tot rabatou

Mågré tot, li dfén d’ anêye a stî pus målåjheye. Å moumint k’ nos ns avans metou a vinde dins les cåbaret et restorants, ces-ci ont ridvou serer botike. Mins nos ns avans bén tnou ås coxhes !
E 2021, årvier des ôtes bressenes, nos avans veyou crexhe ene miete nos vintes, çoula rmetou [comparé] a l’ anêye di dvant.
Mins les anêyes 2020 et 2021 nos åront cwand minme espaitchî di crexhe come nos avéns les pinses. Deus anêyes di pierdowes. Mins djans ! nosse pitite bressene est co la, boutante-vicante, avou l’ aidance di ses coperateus et di totes les djins ki s’ ont rmetou a ratchter des prodûts di leu costé – les courts circûts, sapinse l' electricyin.
Plait-st å Bon-Diè et ås bounès yesses et 2022 serè l’ anêye del rinexhance po tertos.

Jean Cayron, li 31 d’ may 2021.

© licence de libre utilisation CC-BY-SA 4.0