Passer vos condjîs a Gaza

[Eternåcionå­]

Dj’ a-st on ptit-neveu ki studeye dins ene sicole di tourisse e l’ Grande-Dutcheye. Dj’ a manké d’ tchaire dins les cropecindes [tomber en pâmoison] cwand i m’ a-st anoncî li tite di s’ memwere.
I s' adjixheut d’ askepyî [créer] ene adjince di voyaedjåjhe [tourisme] po fé viziter li Binde di Gaza.

Dizo les bombes

Avou ça k’ il a yeu l’ idêye di fé si ovraedje la di fén di scole å moumint ki les bombes plovént so l’ essera [enclave, territoire encerclé]. Deus cint céncwante-cwate moirts, inte di zels 56 efants. Oyi, dit-st i. Gn a todi pus di djins – inte di zels des årtchi-miyårdaires – ki volnut do « tourisse-advinteure». Ass veyou çou k’ i vont-st alouwer come çanses po-z aler fé ene cir-naivyinne [croisière dans l'espace]? Et ci n’ est nén cwand cwand ! Li pordjet divreut esse ovrant-rotant [opérationnel] e 2028. Ostant dire dimwin u après-dmwin.

Kimint intrer?

Mins, lyi di dj', kimint vass fé intrer tes tourisses? Si dj’ el tén bén, gn a k’ on passaedje teresse, tot vnant d’ l’ Edjipe. Et po ene zine u on maket des moenneus edjipsyins – ene vesse må tournêye vinant d’ Palestene u d’ Israyel –, on tel clôs po des longs moes.

Rafayel (mi ptit-neveu k’ on a dit): Bén djustumint, gn årè sacwants relijhas [options] po-z ariver. Prumirmint: a pårti des aiwes eternåcionåles…

Mi: - Ça n’ va nén dins ti ptite tiesse !? N’ ass nén sovnance do batea trouk ki vneut apoirter di l’ aida [aide alimentaire] et ki s’ a fwait aboirder pa on comando israyelî. Gn a sacwants passaedjîs do batea k’ î ont stî dischindous froedmint. Copurade k’ Israyel a rastrindou les aiwes la k’ les pexheus gazawîs polèt aler pexhî.

Rafa: - Pus çk’ i gn a des risses, pus çki ces grossès pratikes la [riches clients] sont-st efoufieyes. Nost ovraedje serè d’ assåvri [sécuriser] li batea, ostant tot martchotant avou les Israyelîs k’ avou les institucions eternåcionåles.

Mi: - Ci côp cial, t’ as des baloujhes e cervea. Ti sais bén ki l’ ONU, c’ est on grand machin – sapinse li Tchåle di France [Charles De Gaulle]. Bråmint do vint et waire di plouve ! Et les bayeus d’ cwårs, l’ Amerike et l’ Urope sont todi les prumîs po tchanter e toetea: « Gn a des toirts des deus costés ; Israyel a l’ droet di s’ disfinde !». Comprindoz: l’ olifant a l’ droet di spotchî on cint d’ soris, s’ end a ene ki lyi a catyî [chatouillé] li ptit doet. U, e rmetant ça al guere di 40: les Almands ont l’ droet di fuziyî 20 civils si des « terorisses» di l’ Årmêye-blantche ont touwé onk di leus omes.

Rafa: - Vos cåzez do passé, la k’ l’ Urope et l’ Amerike bijhrece fijhént li plouve et l’ bon tins. Waitîz l’ dierin vôtaedje al Tåvlotêye des Abondroets del Djin [Commission des Droits Humains]. L’ inkete so des moudes disconte l’ umanité a Gaza e moes d’ may 2021 a stî decidêye pa 24 vwès po – bråmint des payis d’ Afrike et d’ Amerike nonnrece – disconte 9 vwès conte et 14 nén-vôtaedjes [abstentions]. Li prezidinte Mitchîle Bachelet – c’ est cåzu Daxhlet, on no d’ famile walon ! – esteut fene binåjhe.

Mi: - Ki swete ! Mins por mi, ci n’ est nén co dmwin ki l’ vierna si rtoûnrè a l’ ONU et dins l’ moennance do monde. Mins rivnans drî rinne [revenons à nos moutons]. Si vos n’ avnoz nén pal voye del mer…

Rafa: - Gn a les deus ponts d’ passaedjes teresses. Li prumî, a Eress, avou Israyel. Estant mi-minme di stok djwif, dj’ a mes intrêyes låvå po-z awè des passe-avant dins les regues. A Rhafa, avou l’ Edjipe, c’ est ene kession d’ manoye. Avou ene rawete po l’ escursion, on pôrè minme fé passer nos voyaedjeus pa les tunels di frawtinaedje des smocleus [contrebandiers]. Ki c’ est l’ seule intrêye des amonucions (dins les deus sinses do mot) cwand les passaedjes oficirs sont serés.

Mi: - Et cwand ces djins la seront so plaece, ass sondjî k’ i gn a do corant ki cénk a shijh eures par djoû? Tuze k’ i n’ åront ni frigo ni edjaloe [congélateur]. Et si Israyel a co l’ idêye d’ evoyî ses bombes – et pår des viyès bombes å fosfôre come e 2008 – k’ ass preveyou, po tes tourisses?

Rafa: - Nos otels seront bunkerijhîs, mins avou tot l’ lucse k’ i fårè po dmorer ene grosse samwinne dizo tere – les gueres Israyel-Hamasse ni durèt måy bråmint dpus k’ ça. Li corant vénrè di mierpouxhantès panes å solo, mucheyes dins des meurs et des terasses metous ene miete tocostés et raloyîs soterinnmint.

Mi: - Damadje k’ i gn årè pont d’ tarif po les pinsionés. Dj’ ireu voltî a onk di tes voyaedjes po fé on rapoirtaedje pol « Rantoele».

Lucyin Mahin, li 28 di may 2021

© licence de libre utilisation CC-BY-SA 4.0