Li fåve do 11 di setimbe

Eternåcionå / Istwere

La 20 ans, li 11 di setimbe 2001, c' esteut les atacaedjes terorisses di Noû York et Wachintone. Atacaedjes terorisses u nouzome et sinisse espectåke «son et loumire»?
Nos avans yeu lanawaire l’ ådjeu [opportunité] di rescontrer on moenneu d’ avion espagnol ki vént d’ prinde si pinsion. I nos end a dit des sbarantes.

Li modêye oficire

L’ome a raspepyî pont pa pont tot çou k’ a stî dit oficirmint å dfwait des atacaedjes.
Li pus grosse des boudes: on a rtrové li paspôrt d’ onk des terorisses dins les trigus! Do papî ki n’ broûle nén adon li l’ fier des tchessis d’ bildigne fond!
Adonpwis, i m’ djåze do distoûnmint, foû des voyes di volaedje, des cwate avions. Ci foû-voye la deure disca deus eures. Est ç’ Bon Biu possibe?

Tiberi Delgado (T.D.) (li pilote k’ on-z a dit): Nonna ca nonna: s’ i gn a èn areyoplane ki vént foû di s’ voye, li tour di controle saye d’ el ratôtchî, cénk munutes å long. Pu, otmaticmint, gn a des avions d’ tchesse ki s’ enûlèt po l’ shuve. Dj’ a bén dit «otomaticmint», dj’ ô bén k’ i gn a nén dandjî d’ ene otorizåcion d’ on dzeutrin [supérieur] po-z enonder l’ cayet. Dj’ a sovnance do cas d’ on vol Espagne-Brussele do waeyén-tins 2014. Li radio aveut stî serêye on moumint di cåze d’ on måscomprindaedje [malentendu]. Sol côp, des tchesseus francès avént vnou rescontré li plêne [appareil] di Brussels Airlines. Li 11 di setimbe 2001, n’ a nou tchesseu k’ a-st evolé al resconte des cwate avions.

*

Mi: On dit k’ sacwants des terorisses avént stî scolés po moenner des Cessna 172

T.D.: Bénwaite! C’ est come si vos metrîz ene Formule Onk dins les mwins d’ on råpén ki vént d’ aprinde a moenner les otoscoters so les dicåces.


Mi: Vos djhoz k’ les parints des voyaedjeus n’ ont nén vnou cweri après les leurs dins les areyopôrts, dabôrd ki c’ est sovint l’ cas dins les accidints d’ areyoplane.

T.D.: Taiss k’ oyi. On a veyou aploure des curés, des pasteurs, des sicolodjisses, des gaztîs, mins nou parint des passaedjîs.


Mi: Vinans è å sbeulaedje [collision] avou les deus bildignes. Cwè avoz a dire ladsu?

T.D.: Fé tourner on Boyigne come i nos l’ ont mostré dins l’ videyo do bucaedje del deujhinme tour, c’ est pår målåjhey, minme po on vî pilote di mestî ; adon, tot bounmint impossibe po onk ki vént di s’ mete «å volant».
Et pu co: dins l’ minme videyo, l’ avion mousse divins l’ bildigne come dins do boure. Mins li tcherpinte di ces bastimints la, c’ est tot acî et tot feré beton [béton armé]. Sorlon les lwès del fizike, les bokets di l’ avion divèt rdjibler so l’ meur do bastimint, et toumer ådfoû. Portant, on n’ a måy ritrové des bokets d’ areyoplane alintoû!


Mi: Et les tours-bildignes toumer a brigosses come on tchestea d’ såvlon?

T.D.: On a djamåy veyou çoula, so des sfwaits bastimints. Pår tchaire djus a bokets 56 munutes après on målfeu. Insi, a Madrid, e 2005, on sfwait bildigne a broûlé 20 eures å long, mins l’ tcherpinte di fier (47 colones d’ acî, di çk’ i gn a d’ meyeu) a dmoré so pî. Metoz co dins l’ dossî:
* li vitesse do croûlaedje: 8 a 10 munutes, come ene pire rouwêye å fond d’ on pousse.
* les esplôzions, oyowes pa mwints temoens, minme des pompîs. Did dou vnént ele?
* li fondaedje des sômîs d’ acî (ni s’ fwait k’ a 1600 digrés).
* li croûlaedje d’ on troejhinme bildigne, li limero 7, metou dins l’ vijhnåve, sins cotchocaedje d’ avion, avou djusse on ptit målfeu. Pa ké sint?
* les bokets d’ poutrales ki dmorént ont stî radmint tcherdjîs so des camions et ebarkés so des bateas po-z esse rifondous ene sawice e l’ Azeye. Peu d’ î trover del radiactivité?

Et tchik et tchak. Dji n’ vos di nén tot çki vos ploz trover so les waibes «complotisses», et k’ dji n’ vos pou acertiner sincieuzmint.

Li Pintagone

Dji vos rmimbere ki ciste avion la s’ a-st aprepyî do Ministere sins abranle des radårs, a 6 u 7 metes di tere, so on gros kilomete. Il a trawé l’ meur difoûtrin do Pintagone tot fjhant on trô di - e criyant foirt - shijh metes lådje. Adon, l’ avion s’ a svinté [évaporé] a cåze del tcholeur.
La, vos metoz çoula so ene rantoele di soçnaedje [réseau social] asteure, et tertos criyèt Barabasse, come cwè c’ est ene couye berdouye éndjolike [fake-news].
C’ est pår IMPOSSIBE di fé voler on Boyigne 757 a cisse vitesse la si près d’ tere. Èn areyoplane 38 metes lådje et 13 metes hôt!

Lucyin Mahin, li 12 d’ awousse 2021

© licence de libre utilisation CC-BY-SA 4.0 de la Fondation Wikipedia