© 2015, Josse Goffin, Regard à gauche

C’ est kî k’ a sogne des migni-mannixhants?

Nicolai Staelens

Texte

Ecolodjeye:
Migni-mannixhants [Les Micro-polluants]


Sacwants ans lanawaire, ons a studyî el Swisse on drole di pexhon k’aveut candjî d’seke dins on ri. Ons a cachî po vey cwè, et ons a trové ki c’ere ene fabrike di droukes di farmaçreye ki vudive ses aiwes e-n amont.


*

Les aiwes del fabrike estént raclaireyes, da, et shure les droetès lenes k’estént scrîtes djus [directives édictées] po ces cas la dins ç’payis la. Tolminme, l’aiwe k’on vudive aveut co, ådvins, des traeces d’èn alourdineu des xhiyons (dizôrneu des ormones, perturbateur hormonal]), çou qui fwait ki les pexhons måyes ont tourné a pexhenes (frumeles).

 

Pitchote a midjote

 

Ons a stî sbaré pask’i gn aveut fok des totès ptitès traeces ‒ dj’ô bén : foû waire ‒ di cisse sustance la. Ons aveut sondjî ki c’estaxhe trop pô po fé åk. Po dire li veur, on pô s’a aclapé a ene miete, ey ene miete a ene gote, et pitchote a midjote, avou l’timp, les pexhons ont fini pa s’end ecråxhî.

C’est l’etrevén [évènement] k’a fwait k’ons a cmincî a s’abaiti do dandjî di ces gotinetes la [concentrations très faibles]. Pår k’end a nén seulmint dins les mannetès aiwes [eaux usées], mins dins les corantès aiwes eto. Adon : dins l’aiwe a boere.

Dins çou ki s’a passé el Swisse, ça vneut d’ene fabrike di droukes d’apoticåre. Mins asteure on sepe ki l’pus grande pårteye di ces sustances la vegnnut d’nozôtes. Dj’etind bén: di çou k’nos alouwans et vudî ås riketes.

Cwand nos purdans des droukes, nosse coir les rmagne [métabolise], poy i lzè vude foû ås raiwires [toilettes]. Did la, ele vont å rapuroe [station d’épuration].

Mins adon: est-ç’ki ç’n’est nén ås rapuroes didispiede [dégrader] des sustances la?

Sifwait, les rapuroes displouctêynut [désassemblent] les sustances… mins nén pår!

Po sacwantès molecules, ons a des bons rzultats å lzè dispiede, mins nén po tertotes. Po dire li veur, on planixh li bouye a l’avance po shure des regues totåtourreces [environnementales] k’i gn a. Mins ces regues la ni cåznut nén co des migni-mannixhants [micro-polluants].

 

Divudindjes



Taiss k’i gn a ddja des dvudindjes [solutions] po spiyî pår ces molecules la. Mins ça costêyreut foirt tchir d’els ahiver et fé roter. Tchir nén seulmint economicmint, mins eco ecolodjicmint. Pol «totåtoû» [environnement].

Tuzez ene miete: s’on fwait ene trop grande foice po raclairi l’aiwe si télmint, i gn a des ôtes costés do totåtoû k’i fårè manaedjî sifwaitmint. Metans: cotaper [gaspiller] bråmint moens di corant electrike; enûler moens di resserants gåz [gaz à effet de serre] ; ni pus tant bouter avou des agayons ki s’dimougnnut trop vite [produits consommables] etch.

Les aiwes ki rexhnut foû des rapuroes si tapnut todroet ezès ris et mouzes [fleuves], et ces-ci sont-st e-n adujhance avou les solcostés d’aiwe a boere [réserves d'eau potable].

Et si vos n’avoz nén co les sonks ritournés, sepoz ki les migni-mannixhants, ça n’vént nén ki des traeces del farmaçreye. E l’maxhe des aiwes, gn a co des tchitchêyes ‒ pus ptites ou pus grandes, pacôp waire et pacôp bråmint. Des towe-viermene [pesticides], ki savnut sûner dins l’tere, disk’a avni divins les aiwijheas [aquifères].

I gn a co des radjoutas [additifs] e nos plastikes di tos les djoûs, des pezants metås etch. Li pus ki l’tchimeye sait spepyî et corwaitî, li pus k’on tchait so des tchitchêyes dins les aiwes, et ça ralonguit li lisse des migni-mannixhants.



Et l’ Walonreye, sobayî?



Estans ns e dandjî, vaici, e nosse payis?
Po responde a cisse kesse cial, li Walonreye a ahivé et mete e-n alaedje des programes di rcwerance, po corwaitî cwantes k’i gn a, di des sfwaitès sustances, e nos aiwes. Et çou k’ça î fwait.
C’ere les programes IMHOTEP et BIODIEN.

 

*


L’åcoron?  [Conclusion]




Nos poujhåvès aiwes sont haiteyes [saines]!
Mins ça n’vout nén dire tcherete. S’ons a veyou des pexhons tourner a pexhenes ezès ris, i sreut målåjhey di croere k’on sereuxhe aschouwés po todi.

Prumire rimåke: il est pus åjhey di dvudî les arokes al tiesse purade k’al cawe. Et l’tiesse, c’est nozôtes. Bén seur: i fåt todi prinde des droukes. I fårè tolminme waitî a çou k’on tape evoye. Les droukes ki n’sont pus bounes, li vî fond d’sirop po n’nén tossî… Tot çoula ni doet nén aler ås raiwires. Elfåt repoirter a l’apoticåre, por zels les revoyî po esse disploucnés come i fåt.

 

Nos fåt i vormint tot si tant di towe-viermene? Tot si tant d’plastikes? Tertot·e·s, i nos fåt esse pus responsåves.

 



Sicrît pa Nicolai Staelens, ratourné pa Djôr, li 7 d’awousse 2021

© licence de libre utilisation CC-BY-SA 4.0 de la Fondation Wikipedia



Metadata

Auteurs
Nicolai Staelens
Sujet
Micro polluants
Genre
Chronique société. écologie
Langue
Wallon
Relation
Revue Li Rantoele n° 99, automne 2021, Neufchâteau ,Belgique
Droits
© licence de libre utilisation CC-BY-SA 4.0 de la Fondation Wikipedia