© 2015, Josse Goffin, Regard à gauche

«Fir d’ esse antifachisse»

Pol Manipré

Texte

[Eternåcionå / Walonreye­]



« Fir d’ esse antifachisse »
Do moes d’ avri, avou les eleccions e l’ France, on a sovint cåzé do fachisse, ki pôreut rivni dins nos payis. Sapinse sacwantès djins, nos vicréns on tins ki rshonnreut ås anêyes 1930...

Mi, dji m’ dimande çou k’ ça vôreut dire po les waloneus : nos savans k’ e 1930, i gn aveut des loyéns etur puzieurs sicrijheus et l’ pårti recsisse. Nén ewaerant, paski l’ foite droete, ele flate sovint l’ culteure do payis ou do vî tins. C’ est po ça ki, cwand ele n’ est nén adjinçnêye e pårti, on l’ lome eto « mouvmint idintitaire ».



Dins des rvuwes e francès


Ciste idêye la ki l’ fachisse si pôreut rsiervi d’ noste eritance po sayî d’ divni pus foirt, c’ est ene sacwè k' sacwants tuzeus î ont ddja sondjî. I gn a waire di tins, puzieurès gazetes sol foclore ont decidé k’ elle estént responsåves di n' si nén ritrover maxheyes avou cisse tuzance la.
Elle ont scrît e totès letes k’ elle estént des gazetes antifachisses. Dins l' prumî limero di « Hellebore » (octôbe 2019), li scrijheu inglès David Southwell sicrît :
« Les cis k’ inmnut l’ foclore savnut k’ il est todi pus sovint eployî come ene åre [arme] po fé avancî des atuzes come cwè ene metowe culteure ou ene raece dinêye est meyeute k’ ene ôte. Et c’ est ki : des cis k’ i gn a tchôcnut l’ foclore dizo l’ banire d’ on nåcionalisse radicå et otoritaire. »
« Çou k’ est scrît dins ç’-t årtike la, c’ est l’ contribouwaedje da « Hellebore » al rezistance, dit-st ele li djin ki sene l’ editoriå...

Del minme manire, po prezinter l’ gazete « Sornettes » ki va rexhe bénrade, on responsåve sicrît :
« Paski l’ foclore do payis est sovint pris come escuze po vanter des valeurs idintitaires et des stroetès d’ idêyes [...], i m’ shonne impôrtant d’ dire ki ç’ gazete ci est antifachisse, anti-idintitaire et pudrè foirt asteme ås tuzances redjonalisses et tradicionalisses. »

On direut bén k’ c’ est on novea uzaedje, foiravant dins les soces di djonnès djins. Kécfeye minme ki, s’ i fåreut riscrire ouy on manifesse pol culteure walone* , bråmint des waloneus dmandrént k’ on screye tot parey, diré [dès] l’ prumî årtike.


Des barbôjhes?


Vos diroz kécfeye ki, tot ça, c’ est des barbôjhes ; ki l’ contrumasse des djins n’ pinsnut nén insi. Dji n’ sai nén. Ces djoûs ci, a Nameur, dj’ a veu des plake-tot-seu avou l’ messaedje « Firs d’ esse antifachisses » (escrît e walon). Et l’ dessén, c’ est l’ Cok Walon avou troes traits e l’ plaece di si sporon.


Ci simbole la des troes traits, il a stî edvinté e 1932 et i vout dire k’ on-z est conte les fachisses, les stalinisses et les wårdiveus (oubén les capitalisses, i gn a deus diferinnès esplikêyes). C’ est tot on pordjet, saiss ! Mins, a ç’ k’ on pout vey, i gn a ddja des waloneus po l’ disfinde...




Pol Manipré, li 09 d’ avri 2022, so «Belletristica»

© licence de libre utilisation CC-BY-SA 4.0 de la Fondation Wikipedia

* Note 
end a ddja yeu deus, e 1983 ey e 2003; li dierin est ratouné e walon so l’ Aberteke https://rifondou.walon.org/afitcha.html


 

Metadata

Auteurs
Pol Manipré
Sujet
France. Elections. Politique
Genre
Chronique sociale historique
Langue
Wallon
Relation
Revue Li Rantoele 103 automne-hiver 2022
Droits
© licence de libre utilisation CC-BY-SA 4.0 de la Fondation Wikipedia