Esteut ç’ on broûlaedje totoute?

[Sovnances di m’ maladeye]

Dj’ a stî pinsioné a 52 ans. Nén k’ dj’ esteu pressé do cwiter m’ plaece. Dj’ ovréve ås tchmins d’ fier.Dj’ esteu chef-electro, don, tchîf d’ ene pitite brigåde. Onk di nos mwaisses ovraedjes, c’ esteut rsognî les awiyaedjes [aiguillages].

Dimandeu (Dm.) - Avou kibén d’ omes, dabôrd?

Ziré Malet (Z.M.) - Po cisse bouye la, dj’ esteu, å pus sovint, avou deus tecnicyins, deus adjusteus, troes cwate piyotcheus, et dinltins on dzo-chef di gåre. Li dzo-chef di gåre fijheut passer les tréns. Nozôtes, on-z arestéve po lzès leyî passer sins risse d’ accidint.
Et c’ est l’ dizo-chef ki fjheut les telegrames po dire k’ on esteut foû ouve, et ki l' trén k’ aléve passer ni nos aléve nén vni spotchî.

Ey on bea djoû, cwand on a cpårti les tchmins d’ fier e deus, li dzo-chef di gåre esteut dins ene societé et mi dins l’ ôte. Ça fwait k’ on-z a dit : bén ça costêye trop tchir di rmete on deujhinme ome djusse po-z evoyî des telegrames. C’ est l’ chef electro ki va fé passer les tréns.

Dji saveu bén kimint k’ on fjheut : on-z aveut stî scolés po ça. Mins ci n’ esteut nén m’ mestî. Mi mestî, c’ esteut l’ tecnike. Et c’ est foirt sipepieus come reglaedje, et i fåt bén waitî a çou k’ on fwait, et tot ça.

Et cwand on-z a cmincî avou ç’ novea sistinme la, dj’ a stî må. On djoû, dj’ a cåzu toumé la. On m’ a dvou ramoenner disca l’ måjhon. Et pu, dji n’ a pus travayî. Siya : on m’ a rmetou dins on buro on moumint, mins minme vola, dji n’ saveu fé del boune bezogne.

*

Dm. - Vs ôz fwait on broûlaedje totoute, on burnôte, dabôrd?

Z.M. - Oyi, c’ est ça.

Dm. - Mins on n’ cåzéve nén co d’ ça, di ç’ tins la!

Z.M. - Abén non! Et pu mi, dji n’ mi rindeu nén conte di ça. Pocwè çki dji so si må et k' dji n’ a rén!

Dj’ a stî e l’ clinike a Gôdene ût djoûs. Dj’ a stî rtourné. Et po fini, gn a on professeur ki m’ a dit : «vos n’ avoz rén!» A!!! Cwè çki c’ est! Cwè çki c’ est!!!

Dm. - N’ avoz nén veyou tot blanc, dvant?

Z.M. - Cåzu. Dj’ a cåzu toumé flåwe. Cwand on m’ a yeu ramoenné al måjhon, dji m’ a coûtchî dins l’ divan.
Dji pinséve mori, télmint k’ dj’ esteu må. Mins dji n’ sepeu nén pocwè. Dji n’ a compris ça ki lontins après.
Mins ça a stî teribe, hin. Dj’ aléve å medcén. Et l’ medcén aveut fwait s’ cabinet å prumî plantchî. Ebén dji n’ sepeu monter les montêyes, hin! Dji n’ åreu sepou monter les montêyes. C’ est l’ docteur k’ a dschindou. Po vs dire…

Dm. - Ci n’ est nén des coyes, les burnôtes?

Z.M. - A non! Dji n’ av rén do tot. Rén d’ fizike, hin! Må nolpårt, rén do tot. Rén k’ el tiesse. Ça n’ a nén stî tot seu!

Dm. - Vos è tronnez co!

Z.M. - Bén åy paski, a 52 ans, esse pinsioné. Normålmint, dji dveu esse pinsioné a 60 ans. Et s’ dire: «dji so co e boune santé ; dj’ a les conoxhances et tot ça po fé l’ ovraedje ki dji fjheu. Et vola! dji n’ pou nén continouwer.»
Paski dj’ a stî å medcén do tchmin d’ fier ki m’ a dit : «li moes ki vént, vos åroz condjî ; li moes d’ après, vos seroz e l’ seccion po ratinde. Pinsioné li moes shuvant. Ça vos va insi ?» «Oyi!» Cwè çki dj' åreu dit d' ôte?!
Evoye! Dj’ a stî tchiké insi. Come on stron so ene palete! I veyént bén k’ dj’ n’ åreu sepou fé ôtrumint ki d’ accepter.
Paski: on m’ a metou on moumint e buro. Mins dj’ av on caractere di pourcea, ossu, hin. On m’ telefonéve. Ça n’ mi plaijheut nén. Dji djheu : «non!». Et rclap! li telefone. Dj’ av on caractere! A ç’ moumint la, on n’ mi pleut nén aduzer sins k’ dji n’ sôte ås biyokes [hypersusceptible].

Dm. - Dedja dvant u djusse après l’ maladeye?

Z.M. - Après l’ maladeye… ou a des moumints, divant ça… Ça m’ åreut dvou kécfeye mete li pouce e l’ oraye [m’alerter]. Dj’ av dedja candjî di specialité po n’ pus dveur bouter del nute. Paski, les efants, do djoû, i fjhént do brut. Mins, èn efant, ça djowe. Et mi, dji dveu doirmi ossu. Adon, veyoz, on-z est må pris, hin. Et tot ça, po fini, bén ça vos towe, hin.

Eredjistrumint do 28 di djanvî 2022, motoit rischoûtåve so Wikisourd 

© licence de libre utilisation CC-BY-SA 4.0 de la Fondation Wikipedia