Pout on fé bouter des waloneus eshonne ?

Gn a-t i co bén 300.000 ? Metoz deus Walons eshonne, c’ est deus soçons. Metoz è on troejhinme, ça n’ tådje nén po pouwer l’ agnon. Avou l’ cwatrinme, dji vs el waeranti, i s’ vont ploter so waire di tins.

Kécfeye nén a côps d’ bordon. I s’ è ténront a forbate sins fén po des faflotes. Pocwè l’ cok ?

Dj’ el vou bén croere k’ il ont tchoezi l’ imådje d’ on cok po les rprezinter : li cok, i n’ tchante ki so s’-t ansinî. Et des ansinîs, i gn a padvant tchaeke måjhone. C’ esteut ddja come ça vola deus meye ans cwand l’ grand Djule lezî a vnou rlater ene tripotêye. I s’ årént yeu metou eshonne adon... Li djoû d’ ådjourdu, c’ est co tot fén parey. I gn a nouk po rsaetchî si sporon po l’ ôte : s’ i fåt, i s’ batront a moirt come deus coks di sôre [de race]. Nén po esse li pus foirt, mins bén po esse li dierin comoudri a wårder l’ fistou d’ ewou k’ i sont les mwaisses.

Ki les vîs coks si plotnuxhe po wårder li seule afwaire k’ elzî dmeure co, leu no d’ Walon et l’ lingaedje di leu man, dji nel sopoite pus. Dj’ a mia a sondjî po les poyons a vni... si nos vlans co k’ i cåznuxhe come nos.

Måjhnî (Jacques Desmet), li 20 di may 2015