© 2015, Josse Goffin, Regard à gauche

Espert po les dmandeus d’ tcharité

Bruno Picard
Clena Basile

Texte

Beldjike : noste apriyesse avou...

Mi, dji so Ayicyinne et dj’ aléve voltî ås conferinces po dmander des çanses po Ayiti. Et mi, dj’ a bouté di 1975 a 2008 a po ene SNR bedje ki levéve des miyons. Des djins tcharitåves, sins manke. Sabaye ?

On djoû, l’ an 1994, on m’ dimande d’ aler espertijhî des pordjets di l’ SNR k’ on a dit, e l’ Afrike do Sud. C’ est l’ anêye k’ il ont tapé djus l’ redjime d’ Apårteye. Dj’ a atchté ene cwåte di l’ ANC po poleur esse riçû do minisse del Coperåcion. Nos esténs les prumîs Bedjes a-z aveur ci cwåte la. Adon-pwis aler vey ene dijhinne di pordjets. End aveut nén onk k’ aléve bén.

Ké pordjets ?

Metans ene brictreye. Gn aveut la on hopea d’ brikes, mins l’ machene esteut tote eruneye. Mi, dji fime tot çoula, dai, mi. Et des hopeas d’ çanses avént stî alouwés laddé.

Deujhinme pordjet : ene pouytreye di 5000 poyes. C’ esteut on pordjet d’ comeres, e mitan des tienes. Les omes boutént dins les bantoustans. Gn aveut djusse on cok et dijh poyes et ene vintinne di poyons.

Li troejhinme pordjet : sotni on pasteur protestant po-z aidî diswalper on viyaedje. On a dmoré deus djoûs e s’ måjhone, riçûs come des princes. Gn aveut des hôt-pårleus dins totes les coines po schoûter del muzike a môde HiFi dierinne modêye. On palå k’ il aveut, nost ome : 12 a 13 tchambes. Li meyeute nute ki dj’ a doirmou vaila. Il aveut l’ air di viker so blancs poes. Mins i n’ nos a ddja rén mostré di s’ pordjet. Dji n’ a måy veyou çou k’ i fjheut po les djins avou les brokes k’ on lyi voyive.

Cwè rdire vaici ?
Shijh samwinnes sol conte del SNR, biyets d’ avion comprins. Ça lzî costéve 200.000 francs par djin, et on î aléve a cwate. Dji rclame ki c’ est bråmint des cwårs furlés dabôrd k’ on lzềs dvreut leyî po les pôves. « Hê, ti, l’ ôte, dit-st l’ tchîf do pordjet, si ti n’ î vous nén aler, gn a 10 ki s’ prezintront po prinde ti plaece. » Dj’ î a stî, mins dj’ esteu djinné. Rarivé vaici, faleut mostrer mes fimes Super-8 (li cogne di fimes di ç’ tins la), come dit dins nosse contrat. On a rôbalé tote li Walonreye, disca pus lon k’ Tournai. On m’ payive minme mes kilometes, mins dj’ els a rfuzé.

Les ptitès djins vnént vey. Et c’ est ça k’ on fwait avou nos sôs ? Tantea ki les mwaisses di XXX (li soce k’ on dit) m’ ont fwait clôre mi betch. Pus tård – disgosté èn ome !– dji discovra k’ volént les cwårs des calindrîs k’ i vindént. Ene comere nos vna racuzer li vindeuse po nosse province. Et dire k’ elle esteut aplakêye avou onk ki vneut d’ vudî d’ prijhon. Mins dj’ a vitmint veyou s’ djeu : ele vleut tchôkî s’ feye e s’ plaece.

Ayiti : pôvès djins ?
Dj’ a stî a Barvea schoûter ene djin ki n’ aveut stî la ki cwénze djoûs. Ele dijheut ki les Ayicyins ratindént l’ tcharité et n’ rén fé. Dji l’ a rcoridjî. Dj’ a prindou l’ egzimpe del pesse des pourceas. Les ptitès djins avént tchaeke sacwants pourceas, des cabolés noers, disk’ a on cint d’ biesses, ki trovént a magnî tot seus. Li pourcea, c’ est d’ l’ ôr, dit-st on. Avou çoula, les djins evoyént leus efants a scole. Ça n’ plaijheut nén ås grands mwaisses do payis. Des payizans ki vont divni maléns, ça n’ si pout, don, ça. Adon, foirt åjhey, mes djins. Gn åreut co bén ene laide minêye ki rôbalreut dins les pourceas do payis : li pesse.

 L’ Ofice Eternåcionå des Epizoceyes ni fwait ni ene ni deus, dins ç’ cas la : fåt abate tos les pourceas do payis. Après, on amoennrè des Pîtrins ou des grands blancs [Landrace] dins des grossès poitchreyes, ås mwins des gros, por zels fourni del pourcelreye ås mandayes, å pris k’ i vôront.

Après l’ hosmint d' tere
On a veyou des SNR di tos les payis avorer po-z aidî les sinistrés. Des esperts avou des cwate-cwate k’ i gn a nole pareye dins tote li province do Lussimbork. Les pus ritches des Ayicyins, i n’ estént pus la, zels. Evoye ås Estats Unis, po n’ nén atraper les minêyes. Cwand on les vént eterviouwer, les cmeres sont la ki s’ plindèt : « Nos estans si disbåtchîs, vaici. Wai, dji n’ a nén ddja ene meskene po fé a magnî a mes efants ! ».

Minme les curés. A on dinner d’ adoråcions, ti voes on moncea d’ grossès djipes Toyota, tchaeke avou l’ sinne. Oyi, djha-t i l’ eveke, gn a des buddjets a l’ evetchî po çoula.

Bruno Picard et Clena Basile, li 1î d’ octôbe 2015

Metadata

Auteurs
Bruno Picard
Clena Basile