© 2015, Josse Goffin, Regard à gauche

Et portant, e 2015... pol fiesse ås lingaedjes walons...

Lucyin Mahin

Texte

C’ est ene boune vintinne di djins ki s’ ont metou eshonne ene anêye å long po-z adiercî onk des pus clapants etrevéns po nosse walon (sins rovyî l’ picård eyet l’ gåmès) dispu ki l’ monde est monde. 20, 200 ou 2000 ?

Ki, si on prind les chifes des djins k’ ont prindou pårt al bate di lijhaedje, a l’ atôtchance des gazetes, ås deus fiesses d’ adrovaedje et d’ cloyaedje, ci sereut puvite 2000 ki 20. Rén k’ po les lijheus d’ tecses e walon avou les bibiotekes, Nadine Delmåjhonwalone conta 6576 lijheus, 4423 efants et 2153 grandès djins. Çoula dins 37 comenes.

Cwand on lzî dmanda si ça lzî aveut bén plai, so 19 responses, 18 dijhît k’ il avént yeu tchatch, et k’ i racminçrént voltî l’ anêye ki vént.
Tant k’ a l’ ôte bate, li cene des noûmots, li påsse n’ a nén levé do prumî côp. On-z a dvou ralongui li tins do concours, disk’ å 15 d’ awousse. Tolminme, gn ava 12 bateus, tertos avou des foirt sûtîs noûmots. Li djuri nerén n’ esteut nén fwait di djins k’ ont les minmès idêyes sol walon. Pår avou cwate bateus ki dnént leus noûmots e rfondou, et des djuris ki n’ djurnut ki påzès walons coinreces.

Portant gn a pont yeu d’ margaye di d’ apougnaedje på colé. Les rzultats ont stî dnés po les cwate grandès sôres d’ accint walon, et pår e picård ey e gåmès.

Les ocupaedjes ezès viyaedjes estént moens riskeus, veyanmint k’ les adjinçneus ovrént beacôp avou les djins d’ leus djins. Portant on a veyou des raploûs come a Rotchfoirt la k’ les copineus do payis s’ avént assoçnés avou les Relîs namurwès eyet l’ Aisse del Tuzance po ene après-nonne k’ a l’ air d’ aveur continté tertos.

Li walonissîme lu-minme (li dierin djoû) åreut polou amoenner bén do disdut, ca les waloneus si batént eshonne (påjhirmint). N’ a cwanlminme pont yeu d’ djostés al fén del shijhe. Et on n’ a nén ddja oyou brutyî ki l’ djuri aveut stî atchté påzès wangneus namurwès k’ estént dins leus waibes. Come cwè, sapinse a Veronike Roba, l’ espwer n’ est nén a ctaper.

Lucyin Mahin, li 14 di nôvimbe 2015


Metadata

Auteurs
Lucyin Mahin
Langue
Wallon