Djans è, vos, l’ Waloneye ! Allez , Wallonie!

Walonreye / politike

Asteure, l’ estance economike di nosse redjon walone divént todi dpus halif halof. « C’ est pé k’ e l’ Grece, roci » lét on télfeye dins les gazetes.

Fåt l’ erconoxhe : ci n’ est nén blincant blincant.

Portant…

Portant, ça n’ a nén todi stî come çoula. El Waloneye esta lonmint on ritche payis. Oyida k’ totafwait n’ ît nén tot bea tot djoli. Oyida ki, di ces trevéns la, gn aveut bråmint des djins k’ estént pôves. Mins nerén, c’ est avou nozôtes k’ el Beldjike divna el deujhinme pouxhance del Daegne, e 1880. Nos tayons n’ ont nén dvou ratinde el colnijhaedje do Congo-Kinchassa po pleur basti l’ payis. Adon, sayans d’ leu rinde bon dvwer, el plaece di les rnoyî. Porshuvans leu loumiant ovraedje, tot-z amidrant leus flotches come el colonialisse.

Tote seule so 50 ans !

Çou k’ i fåt sawè yet ritni, mes binamêyès djins, c’ est k’ el Waloneye, ele n’ esteut rén li 27 di setimbe 1830. Ele n’ aveut pont d’ liårds. Elle esteut tot seule, avou les Flaminds, conte el Daegne etire.

Cénk dijhnêyes [décades] après, elle aveut tot adiercî. Gn av nolu ki l’ aveut-st aspalé, so l’ tins di ces anêyes la. Savoz pocwè nosse payis a divnou l’ deujhinme pouxhance daegnrece après l’ Inglutere ? Mi, dji vs el va dire. Mins nerén, divant d’ porshuve, dji vs advierti ki dji va esse ene miete crou dins m’ pårlaedje. Voci l’ respondaedje al kesse. « El cok walon a prindou ses coyes ey i les a pôzé sol tåve. El cok walon, c’ esteut ene fire biesse. El cok walon, i vla mostrer a tertos k’ on ptit payis pleut mwaistri s’ destinêye. El cok walon, i vla eto avanci, paski ses iys riwaitént viè l’ avni. »

Dispu m’-n nexhance, e 1999, disk’ enute, dj’ a todi veyou no simbole subiter [faiblir, risquer la mort subite]. On djoû, l’ Ospice Sint-Djîle [sidje do pårlumint walon; did la, li pårlumint walon lu-minme.]  doerè comprinde ki nosse nåcion doet saetchî s’ plan leye tote seule. Ni soeyans nén do bos k’ on fwait les violes. Dj’ a les pinses k’ el Flande ni nos va nén çansler disk’ al fén des féns. Po çoula, dji croe k’ end a mwintes ki seront d' acoird avou mi. 

Mins après ?

Dji lé sovint k’ sacwants raloyisses volnut k’ on-z ervåye avou l’ France. I shonnnut awè rovyî ki c’ est les Francès k’ ont-st abroké e l’ Walonreye e 1785. Dj’ ô bén ki ça a stî des evayixheus pareys ås Almands e 1914 eyet 1940.

Çou ki Jules Gheude  [ il a skepyî e 1946; c’ esteut on soçon da François Perrin, do Rassemblement wallon; sicrijheu et fonccionaire, i serè tofer on pirlodjeu do raloyaedje al France.]   eyet ses soçons roveynut bén, c’ est k’ les Walons n’ sont nén des Francès. Cwand el Rassemblement Wallonie France s’ aveut prezinté åzès votaedjes, e 2009, il avént fwait berwete. Di 2009 a 2011, c’ esteut tolminme les anêyes ewou k’ el Beldjike aveut bén manker d’ schirer. Eyet ç’ pårti raloyisse la n’ a nén ddja prindou pårt åzès dierins votaedjes, la troes ans did ci. Fåt nén dmander !

Les cis ki m’ léjhnut dispu des moes et des ramoes  [sol waibe « Beletristica », asteure so m’ waibe-blok mon « wordpress.com ».]   ont dvou saizi ki dji predi el fén del Beldjike po bénrade. I n’ pôreut nén vali ! [le contraire serait étonnant]

C’ est po ça ki nosse nåcion doet rloukî viè l’ avni, come ele li fjheut, a stî on tins. Nos n’ estans nén les seus ki s’ vont, motoit, dislaxhî d’ èn estat uropeyin. Riwaitîz do costé di l’ Escôsse ubén del Catalogne.

Ouy, on voet eto l’ minme sacwè avou les Serbes del Bosneye.
Veyoz, l’ Urope va candjî, azår. Nozôtes, nos doerans esse presse.
Ça, les Flaminds, zels, i l’ ont ddja bén comprindou.
Nos vijhéns bijhreces s’ avént bén apresté a l’ atake pol federalijhaedje do payis. Nozôtes, nos avans raté l’ ocåzion.

L’ av rimårké ?
Dj’ a sayî d’ escrire ci tecse ci avou optimisse.
Dalez motoit acertiner k’ i n’ est dandjreus nén possibe di fé pé k’ asteure. Vos serîz kécfeye dins l’ bon.
C’ est come avou tot ; metans : el shijhinme distindaedje di masse, el parminêye yet l’ après-cronivirûsse.

Tot dpind d’ çou ki ns dalans foirdjî.

Samuel Dumont, so « elgueuyenoere.wordpress.com », li 29 di djanvî 2022, revue Li Rantoele 101 Bontins 2022

© licence de libre utilisation CC-BY-SA 4.0 de la Fondation Wikipedia.