Paskeyes di refudjîs nén Oucrinnyins

[Eternåcionå]

Dji studyive a Kiyev dispu deus ans, mins dj’ aveu ddja fwait troes ans di scoles a Djniepro [Dniepropetrovsk]. Li 26 di fevrî, il a bén falou cwiter.Dji vos raconte les paskeyes k’ on a viké après l’ trén Kiyev-Lvov (shûte di çki dj’ a dit e l’ Rantoele 101, p. 4).

Ramassés a Lvov

A Lvov, li prumî djoû, on a stî ramassés pal police especiåle. C’ est les SBOu, l’ ancyin KGB, maskés et avou les calachnicofs å pougnet. Pask’ on cwereut on djîsse po doirmi, et k’ c’ esteut covere-feu.
Nén peter on mot d’ rûsse, mes omes. Boerler a vitesse grand V e-n oucrinnwès ! Impossibe po nozôtes di comprinde çou k’ i vlént. Tos Arabes eshonne : i nos prindént po des terorisses !
Tchance eto : gn a-st arivé ene viye Oucrinnyinne, ressåvêye di Kiyev come nozôtes. Ele lezî a spliké les pondants et les djondants, et i s’ ont racoeyi [se sont calmés]. Et nos moenner dins on grand dortwer avou des ôtes efuyîs, la k’ on passa l’ nutêye.
27 di fevrî

Li londmwin, nos avans volou prinde on trén po Tchope, li dierinne veye divant l’ frontire. Mins gn aveut la ene trope di sins-papîs afrikins ki nos espaitchént d’ moussî e l’ gåre. On s’ a payî on tacsi, nozôtes cénk. Tot tuzant wice aler après : Pologne, Slovakeye u Hongreye.
Pol Pologne, faleut roter cwatre eures. Avou ça k’ on a veyou des videyos ki tournént sol Daegntoele la k’ les dwanîs polonès macsådént des Afrikins ki volént passer l’ frontire par la. Li Slovakeye, leye, vineut d’ clôre si passaedje, tot djhant k’ elle aveut ddja ascoyî s’ cwota d’ efuyîs [fuyards, réfugiés]. Dimoréve li Hongreye. Li posse frontire est a ene eure et dmey a pî. On s’ a don metou e-n erote, dins on hagnant vint d’ Sibereye ki nos sbijhive les lepes et l’ vizaedje.

Oyi mins vola, tintin ! Po passer l’ frontire, faleut esse dins on cår u ene oto. Kimint fé ? Nos avans passé l’ nute dins ene cahoute ås martchandijhes, tins k’ i djaléve a pire finde divant l’ ouxh.

28 di fevrî

Li londmwin å matén, gn a onk di nozôtes ki tuza a houkî noste ambassade a Boudapesse.
Li Bon Diu n’ avoye djamåy li fa sins l’ sorfa [come par une intervention providencielle], i fourît d’ acoird di nos evoyî on cår, et relére 75 djins, les cis k’ avént evoyî ene foto d’ leu paspôrt.

Come d’ efet, di l’ après-prandjire, li cår s’ amoenne et tcherdjî les 75 inscrîts. Oyi, mins di ç’ trevén la, gn aveut ene cåkêye d’ ôtes Marokins k’ avént aploû al frontire. Et voleur monter d’ tote foice. Li tchåfeuse do cår saveut bén k’ ele ni pasreut nén l’ dwane fortcherdjeye. Ele lezî a clôs l’ ouxh å nez. Adon zels ont assidjî l’ cår, si coûtchî dvant les rowes, et bouxhî conte les cwåreas a les spiyî. I djhént: « Dj’ alans crever d’ froed ci nute cial divant l’ ouxh. On schape tertos eshonne u on mourt tertos eshonne. »

On-z aveut bén sayî d’ houkî les policîs hongwès, mins nos esténs co so on parkigne costé oucrinnyin. Si n’ avént i nén l’ droet d’ î avni.
Nos avans dmoré la arokés tote li nute. On s’ a pårti, inte voyaedjeus, li restant des dates et les kékes botayes d’ aiwe k’ on-z aveut co.

Dins l’ Union Uropeyinne

Tolminme, li londmwin l’ ambassade a-st evoyî on deujhinme cår. Li tins k’ nos essereus [assiégeants] si dårénxhe dissu po-z awè ene plaece - end aveut nén co assez po tertos -, nosse tchåfeuse esprinda l’ moteur, et s’ aler stitchî dins l’ rîlêye d’ otos k’ alént passer l’ dwane, avou l’ binamêyisté d’ on gros camion ki lyi a leyî ene plaece. La, ns esténs so l’ triyaedje des Hongrwès, et les « grevisses del nute » ni nos plént pus vni acweri.
Al fén, fé vizer les paspôrts a Zahoni, avou l’ prumî catchet d’ on payis di l’ Union Uropeyinne. Schapés, nozôtes... ki dj’ creyéns. Mins nos esténs co d’ doûce creyance.

Arivés a Boudapess, nos avans stî ascoyîs a môde di djin, et evoyîs dins on grand otel, avou des ôtes pareys a nos. K’ avént rçû on rciné [collation] a leu-z arivêye, zels. Mins i n’ dimoréve pus rén po nozôtes. Et pont d’ uros po-z atchter ene pitite marinde dins on botike di nute, nozôtes ki n’ aveut cåzu pus rén magnî dispu deus djoûs. Dji n’ avéns sepou aveur ki des dolårs divant di steper evoye. Ns avans co dvou « soper par keur » [dormir sans souper].

Ureuzmint, les troes ôtes djoûs k’ nos dmorîs e l’ otel, on a magnî et boere prodeyo.
Li shûte å côp ki vént... motoit.

Zahra Aimad, espoûle racontêye e francès al copinreye di Rotchfoirt, li 9 di måss 2022; ratournaedje : Li Rantoele.

Lucyin Mahin, 2e trimestre 2022, Neufchâteau, Belgique

© licence de libre utilisation CC-BY-SA 4.0 de la Fondation Wikipedia