Diner s’ sonk

Cwand les djins mi dimandèt «C’ est cwè vos pasmints d’ tins?», dj’ elzî respond copadecô ki dj’ inme bén di dner mi sonk al Rodje Croes.
Oufti, vla ene sacwè d’ drole, dijhèt i tot m’ loucant avou des ouys come des sårletes. Taiss ki c’ est ene sacwè ki les djins n’ î sont waire adûs, wai, nouv côps so dijh.

*

Gn a des condicions

Dj’ a les pinses ki sacwants dinrént voltî leu sonk, mins i n’ si savèt decider a cåze k’ i dårniyèt ‒ u kécfeye flåwi ‒ a schipe veyèt i ene gote di leu sonk. Li parfonde råjhon est motoit a rcweri do tins k’ il estént co efants, savoz. Motoit s’ ratuzèt i, divintrinnmint, l’ aweye del blanc-mousseye vinowe po ls eplocter disconte do tetanosse u del kéntosse. Dandjreus k’ i n’ si savèt dismacraler di ç’ viye sogne la.


End a eto beacôp ki vôrént bén dner, åy. Mins – c’ est damadje – i n’ respectèt nén les condicions. Ca li prumî d’ tot, c’ est di n’ nén mete si prôpe santé e dandjî. Adonpwis, èn nén enindjî ene sakî avou ene mannete minêye. Aprume les cenes k’ on hape cwand on-z onore Venusse divant Djunon, dabôrd. Schåynete et platkizak, ass on novea galant u ene novele mayon? Bardaf, ti rawådrès co ene ene miete. Ca fwait k’ i t’ fårè responde a toplin des kesses ene miete disrindjantes. Boutans: «avoz rôbalé foû-payis? » ; «kés mehins avoz yeu avou vosse santé? ». Mins aprume et sortot por zels waitî kî k’ t’as coûtchî avou lu ou avou leye.

*

Sonk? Plasma? Plaketes?

Avnou låvå, dins on metou «cinte di dnaedje » [centre de prélèvement], ti pous, åy, diner do sonk. Mins ossu ti plasma ou tes plaketes. Pol sonk, c’ est mo simpe, wai: ene aweye e bresse, vint munutes, diss, et hop, vocial l’ afwaire. Tant k’ å plasma ey ås plaketes, i fwait pus målåjhey d’ è dner, voess. Prindans l’ cas do plasma.

Gn a ene sôre di grosse éndjole ki va tûtler t’ sonk come on picron. Adonpwis, el cahossî dins ene sôre di scrameuse å laecea. Siya! avou l’ minme idêye di schåyî l’ boure do laecea. Bawitch: douvént k’ les djins ni pôrént nén bistoker leu «rodje ôr », dabôrd ki les gades et les vatches nos dnèt bén leu blanc, zeles! Såf ki, cial, li tourbene, po cmincî, endè rsaetche evoye on djaenåsse likide. C’ est on concintré di rodjès globules, k’ i t’ ritchôkèt divins tes voennes. On côp ciste operåcion la tote fwaite, ribardaf! l’ éndjole ratake si ptit djeu. Après cénk, shijh côps, elle årè rimpli a hope ene taxhlete di 700 ml.

Les plaketes, zeles, c'est cåzu tot fén parey. Djusse on truk: on t’ poujhe kékès aglumiantès celules. Po les plaketes, ti sonk, tel pous dner tos les troes moes. Tant k’ å plasma, t’ î pous aler ene feye li moes. Et pår tos les cwénze djoûs po ene pitite termene. Pu, on t’ lai e påye.

Al môde d'on modeu [trayeur] ki miloute ses midonès dneuses, ces blanc-moussîs la ti sognèt et rassognî ås féns k’ t’ åyes håsse d’ î raler sovint. Après troes modaedjes di plasma, ene plaece di cinema. Drola aboere a rdoxhe et totes les biscûtes ki t' vous. Avou ça, kimint co tchicter? Dåre t’ î sol pî sol tchamp!

Î aler tenawete, minme si c’ est pô d’ tchoi, c’ est tolminme ene manire di rinde siervice a des djins k’ end ont foirt dandjî, paret.

David Blaude, li 11 di may 2023

© David Blaude, revue Li Rantoele n° 106, Neufchâteau, Belgique